Алматы қалалық Қоғамдық денсаулық сақтау басқармасы жаңа крематорийдегі қызметтердің құны туралы ақпаратқа түсініктеме берді.
Әлеуметтік желілерде кремация бағасы құжаттарды ресімдеу, тасымалдау және урнаны қамтитын қызметтер кешені үшін 250 мыңнан 460 мың теңгеге дейін жететіні туралы ақпарат пайда болды. Бұл ретте, жаңа алматылық крематорийдегі қызметтердің болжамды құны шамамен 260–280 мың теңгені құрайды.
Жағдайды нақтылау мақсатында агенттік қалалық Қоғамдық денсаулық сақтау басқармасына жүгінді. Онда ведомствоның Қалалық патологиялық-анатомиялық бюромен (ҚПАБ) бірлесіп, крематорийді іске қосу бойынша кешенді іс-шаралар жүргізіп жатқаны түсіндірілді. Оның ішіне бағалар прейскурантын дайындау, мекеменің жұмыс істеуінің ішкі ережелерін және тікелей ҚПАБ қалыптастыратын басқа да нормативтік құжаттарды әзірлеу кіреді.
«Кремация құны ҚПАБ жұмсаған тікелей және жанама шығындардан, сондай-ақ болжамды пайда нормасынан құралатын болады,» – деп жауап берді Қоғамдық денсаулық сақтау басқармасы басшысының орынбасары Ермек Тәжімұрат «Қазақпарат» сауалына.
Ол сондай-ақ бүгінгі таңда қызметтер тізімі анықталғанын, құнын калькуляциялау жүргізілгенін және құжаттама бекіту сатысында екенін атап өтті.
Сонымен қатар, крематорий жұмысының басталу мерзімі әзірге нақтыланған жоқ. Мекемені іске қосу ұйымдастырушылық процедуралар аяқталып, қызметті жүзеге асыру үшін қажетті нормативтік-құқықтық база қалыптасқаннан кейін жақын арада орын алады.
Айта кетейік, 2025 жылғы 17 қазанда қала әкімдігінің қаулысымен крематорий Қоғамдық денсаулық сақтау басқармасының «Қалалық патологиялық-анатомиялық бюро» ШЖҚ МКК теңгеріміне берілген болатын.
Бұған дейін хабарланғандай, крематорий ғимаратында қоштасу залы, кремациялық пештері бар залдар, сондай-ақ қайтыс болғандардың денесін кремация процедурасына дейін және күлін сақтауға арналған бөлмелер жабдықталған. Нысан құрамында екі кремациялық пеш, желдету және ауаны баптау жүйелері, бейнебақылау, денелерді сақтауға арналған медициналық тоңазытқыш камералары, сондай-ақ кеңсе-тұрмыстық техника (компьютерлер, принтерлер, су диспенсерлері және т.б.) қарастырылған.
Крематорий Алатау ауданындағы ЖЭО-2 (ТЭЦ-2) маңында орналасқан. Оның құрылысына бюджеттен 1,5 млрд теңге бөлінді. Ғимараттың дайын болғанына қарамастан, нысанды қай құрылым өз теңгеріміне алатыны туралы мәселе ұзақ уақыт бойы шешілмей келген еді.
Әділет министрлігі Қазақстанға крематорий құрылысы не үшін қажет болғанын бұған дейін түсіндірген болатын.
2024 жылы Алматы әкімдігі крематорий құрылысымен айналысқан мердігерді сотқа берді. Сот шешімімен «ТаразҚұрылысИнвест» ЖШС мемлекеттік сатып алудың жосықсыз қатысушысы деп танылып, жергілікті бюджетке 2 775 414,62 теңге қайтаруға міндеттелді.
