Атырау облысы Жангелдин ауылындағы отбасын аяусыз өлтірді деген күдіктіге тағылған айыптар тізімі толығып, тағы бір бап қосылды, деп хабарлайды өңірлік полиция.
ІІМ баспасөз қызметінің ақпаратына сүйенсек, күдікті Сұлтан Сәрсемалиевке қатысты тергеу енді Қылмыстық кодекстің екі бабы бойынша жүргізіліп жатқанын хабарлады:
- 99-баптың 2-бөлігі – «Екі немесе одан да көп адамды өлтіру»;
- 188-баптың 2-бөлігі – «Алдын ала сөз байласу арқылы адамдар тобы жасаған ұрлық».
«Атырау облыстық Полиция департаменті кісі өлтіру, сондай-ақ, олардың мүлкін ұрлау фактілері бойынша қылмыстық істі тергеп жатыр. Қылмыстық іс бойынша күдікті ұсталды және сот оған қатысты күзетпен ұстау түріндегі бұлтартпау шарасын санкциялады», – деп хабарлады ІІМ.
Атырау облысында Жангелдин ауылындағы бір отбасын өлтіру оқиғасы тергелуде. 2025 жылдың желтоқсан айының соңында туыстары зейнеткер ерлі-зайыптылар мен олардың ересек балаларының жоғалып кеткенін хабарлаған болатын. Кейінірек, 6 қаңтарда Жангелдин ауылында зейнеткер ерлі-зайыптының мәйіті табылды. Кейіннен құқық қорғау органдары мәйіттердің өз үйінің аумағындағы шаруашылық құрылыстың астынан табылғанын хабарлады.
Ерлі-зайыптыларды жерлеу рәсімінен кейін бірден, 8 қаңтарда полиция іс бойынша негізгі күдіктіні жариялады. Ол отбасының 29 жастағы күйеу баласы – Сұлтан Сәрсемалиев болып шықты. Оның отбасының кіші қызы Ақбаян Мұқанғалиевамен бірге елден кетіп қалғаны белгілі болды. Ер адамға халықаралық іздеу жарияланды.
24 ақпанда Сәрсемалиев пен Мұқанғалиева Индонезияның Сенару ауылындағы қонақ үйлердің бірінде ұсталды. 25 ақпанда Ішкі істер министрінің орынбасары Санжар Әділов Ақбаян Мұқанғалиеваның да іс бойынша күдікті деп танылғанын хабарлады.
9 наурыз күні кешке күдікті ерлі-зайыптылардың Алматыға экстрадицияланғаны белгілі болды, онда Сәрсемалиев Наурыз Мұқанғалиев пен Мирамгүл Қарабалинаны өлтіргенін мойындап, олар көмілген жерді көрсетті. Ағалы-қарындастың мәйіттері Атырау іргесіндегі Геолог мөлтек ауданынан табылды.
