Биыл Алматы Көктем мерекесін ерекше ауқымда қарсы алып отыр. «Наурызнама» тұжырымдамасы аясында қаланың әр бұрышында 200-ден астам іс-шара өтіп жатыр. Егер сіз мерекелік күндерді қайда өткізуді білмей жүрсеңіз, Kursiv Media сіздерге ең қызықты локациялар мен бағдарламалар тізімін дайындады.
Басты мерекелік алаңдар:
- Астана алаңы (Ескі алаң)
- Абай алаңы (Республика сарайының алды)
- Панфилов және Жібек жолы (Арбат) көшелері
- Тұңғыш Президент саябағы
21 наурыз: Ұлыстың ұлы күні басталады
Астана алаңы (11:00 – 22:00)
6 бірегей киіз үй: Робо-киіз үй (космос пен роботтар), Digital 360 (виртуалды Шымбұлақ), археологиялық және этно-дизайн үйлері.
Гала-концерт: Сахнада «Дос-Мұқасан», «Ұлытау», Медеу Арынбаев, Сәкен Майғазиев және арнайы қонақ әзірбайжандық әнші Роза Зергерлі.
Абай алаңы (12:00 – 22:00)
Түркі әлемі халықтарының жәрмеңкесі: Түркия, Өзбекстан, Қырғызстан және Тәжікстаннан келген қолөнершілердің бірегей бұйымдары.
Музыка: Айгүл Үлкенбаева мен Arkaiym тобының этно-шоуы.
Арбат және Панфилов көшесі
КітапFest-2026: Кітап сүйер қауым үшін 40 баспаның көрмесі мен Smart Yurt киіз үйі.
Robo DJ шоуы және кешкісін «Dream Light» жарық шоуы.
22 наурыз: Жұлдызды шеру мен халықтық серуен
Астана алаңы (11:00 – 22:00) Жастардың сүйікті артистері: Әлішер Кәрімов, Марсель, Turar, Ray және т.б. қатысуымен үлкен концерт.
Абай алаңы (11:00 – 21:30) Мұнда да жұлдызды құрам: Әли Оқапов, Айқын, Балжан Бидаш және аңызға айналған «Дос-Мұқасан» тобы өнер көрсетеді.
Метро бекеттеріндегі фотокөрме: Егер жолыңыз түссе, «Жібек Жолы», «Алмалы», «Сайран», «Сарыарқа» бекеттеріндегі ұлттық мұра фотокөрмесін тамашалаңыз.
23 наурыз: Мерекенің қорытынды аккордтары
Астана алаңы (11:00 – 18:00) Күндізгі бағдарламада «Парасат» этно-ансамблі мен талантты жас орындаушылар өнер көрсетеді.
Абай алаңы (11:00 – 21:30) Кештің басты жұлдыздары – Роза Рымбаева, Жұбаныш Жексенұлы және «Дервиши» ансамблі.
Балалар мен цирк сүйер қауымға
21-25 наурыз аралығында «Алатау» дәстүрлі өнер театрының алдында (Нұркент ш.а.) «Наурыз шоу» цирктік бағдарламасы өтеді. Мұрат Мұтырғанов бастаған акробаттар мен үйретілген жануарлар балаларға ұмытылмас қуаныш сыйлайды.
21-23 наурыз күндері Алматының орталық көшелері жабылуы мүмкін, сондықтан метроны немесе қоғамдық көлікті пайдаланған ыңғайлы. Сондай-ақ, Арбаттағы «Almaty AI – Болашаққа саяхат» LED-туннеліне барып, болашақтың Алматысын көруге болады.
