Мұнай бағасы шарықтады: Таяу Шығыста не болып жатыр
АҚШ пен Израиль Иранның стратегиялық нысандарына алғаш рет ауқымды соққы берді. Тегеран бұған жауап ретінде көршілес елдердегі мұнай-газ нысандарын атқылайтынын ескертіп, Парсы шығанағындағы жағдайды шегіне жеткізді. Kusiv Media Таяу Шығыстағы соңғы жаңалықтарды топтастырды.
Соққының салдары: «Оңтүстік Парс» істен шықты
АҚШ пен Израиль әскери күштері Иранның ең ірі энергетикалық инфрақұрылымына бірлескен шабуыл жасады. Бұл аймақтағы ең ірі өндіріс ошақтарының нысанаға алынған алғашқы жағдайы. Соққы нәтижесінде әлемдегі ең ірі газ кен орындарының бірі саналатын «Оңтүстік Парс» (South Pars) кешенінің 3-тен 6-ға дейінгі фазалары жұмысын тоқтатты.
Сонымен қатар, Асалуйе өңіріндегі мұнай өңдеу зауыттары мен мұнай-химия кешендері де айтарлықтай зардап шеккен. Иран тарапы мұны елдің энергия секторына жасалған тарихтағы ең ауқымды шабуыл деп бағалап отыр.
Тегеранның сесі: Нысанада кімдер бар?
Иран билігі бұл әрекетті жауапсыз қалдырмайтынын мәлімдеп, Парсы шығанағындағы АҚШ одақтастарының нысандарын «заңды нысана» деп жариялады. Ресми Тегеран келесі нысандардың маңындағы тұрғындарға шұғыл ескерту жасап, аймақтан кетуді сұрады:
- Сауд Арабиясы: Самрэйф МӨЗ және Джубайль мұнай-химия кешені;
- БАӘ: Аль-Хосан кен орны;
- Катар: Мейсайд кешені және Рас-Лаффан МӨЗ.
Иран бұл нысандарға жақын сағаттарда соққы берілетінін ашық айтты. Бұл мәлімдемеден кейін Сауд Арабиясы кейбір өндіріс орындарынан қызметкерлерін эвакуациялай бастаса, Катар тарапы Израильді жағдайды ушықтырды деп айыптады.
Мұнай бағасының шарықтауы және Түркияға қауіп
Қақтығыстың ушығуы әлемдік нарыққа бірден әсер етті. Мұнай бағасы шұғыл көтеріліп, барреліне 110 долларға жуықтады. Еуропада да газ бағасының өсуі байқалуда.
Бұл жағдай Түркия үшін де үлкен энергетикалық қауіп тудырып отыр. Түркия импорттайтын газдың 10%-дан астамы осы Ираннан келеді. Масштабты түсіну үшін: 2025 жылы «Оңтүстік Парс» кен орнында тәуліктік өндіріс 730 млн текше метрге жеткен болатын. Енді бұл жеткізілімдердің тоқтап қалу қаупі туып тұр.
Сарапшылардың пікірінше, егер Иран көршілес елдердің инфрақұрылымына шынымен соққы берсе, бұл жаһандық энергетикалық дағдарысқа әкеп соқтыруы мүмкін.
