Әлеуметтік желіде жүздеген ақбөкеннің пойыз дөңгелегінің астында қырылып жатқан видеолары тарап жатыр. ҚТЖ желідегі кең таралған видеоға қатысты пікір білдірді. Ақпаратқа сүйенсек, бұл кадрлар 2024–2025 жылдары түсірілген.
«Бұл видеолар мұрағаттан алынған, қазір жағдай мұндай емес», – деп мәлімдеді ҚТЖ.
Дегенмен, компания видеоға түскен оқиғалардың Колутон-Жалтыр және Жеңіс-Қызылжар учаскелерінде, жануарлардың теміржолға шығуын тежейтін қорғаныс қоршаулары болмаған кезде орын алғанын нақтылады.
Қауіпсіздік пен миграция арасындағы қайшылық
Қазіргі уақытта, компания мәліметінше, жағдай қайшылықты сипатқа ие. Бір жағынан, теміржолшылар жануарларды қағып кетудің алдын алу және қозғалыс қауіпсіздігін қамтамасыз ету үшін мал қоршауларын орнатуда. Екінші жағынан – орман шаруашылығы және жануарлар дүниесі аумақтық инспекциясы конструкциялар киіктердің табиғи миграциясына кедергі келтіретіндіктен, оларды демонтаждауды талап етуде.
Жануарлар мен пойыздар үшін қауіп
«Экологтардың нұсқамасына сәйкес компания қорғаныс қоршауларын алып тастауға мәжбүр, бұл жабайы жануарлардың теміржолға шығуына қайтадан жол ашады. Бұл ретте ауыр салмақты құрамның тежеу жолы бірнеше жүздеген метрді құрайды және үйір кенеттен пайда болған кезде шұғыл тежеу әрдайым соқтығысудың алдын ала бермейді», – деп атап өтті ҚТЖ.
Компания бұл мәселені біржақты шешу мүмкін емес екенін баса айтып, тиісті ведомстволарды киіктер популяциясын сақтауға және сонымен бірге, пойыздар қозғалысының қауіпсіздігін қамтамасыз етуге мүмкіндік беретін бірлескен тәсіл әзірлеуге шақырды.
