Қазақстанның Ұлттық Олимпиада комитеті мен Азия Олимпиада кеңесі арасында 2029 жылы Алматыда қысқы Азия ойындарын өткізу туралы ресми келісімшартқа қол қойылды, деп жазады «Қазақпарат«.
2026 жылғы наурыздағы жағдай бойынша Қазақстанда ұйымдастыру комитетін құру және бюджетті жоспарлау жұмыстарын бастау енді ғана жоспарлануда.
«Жақын арада мүдделі мемлекеттік органдар мен спорт ұйымдарының қатысуымен бірқатар кеңестер өткізу жоспарлануда. Осы кеңестердің қорытындысы бойынша дайындықты, Ойындарды өткізу бағдарламасын, алдын ала есептеулерді және қажетті нормативтік шешімдерді қоса алғанда, одан арғы ұйымдастырушылық қадамдар айқындалады», – деп хабарлады Спорт министрлігі.
Ойындар шамамен 2029 жылдың алғашқы қысқы айларында Алматының қазіргі спорт нысандарында өтеді. Тек конькимен жүгіру спорты бойынша жарыстар мәселесі әлі шешілмеген, себебі ереже бойынша олар жабық аренада өтуі тиіс. Ал Алматыда мұндай нысан жоқ.
Басқа ұйымдастыру мәселелеріне келсек, ірі мультиспорттық шараларды қабылдайтын қалалар мен елдерде дәстүрлі түрде ұйымдастыру комитеті құрылады. Ол Азия Олимпиада кеңесімен, халықаралық федерациялармен, мемлекеттік органдармен және демеушілермен өзара іс-қимыл жасай отырып, одан арғы дайындықты қадағалап, Ойындар бюджетін басқарып, жарыс бағдарламасын бекітеді.
Сонымен қатар, Азиада-2029 логотипі мен бойтұмарын әзірлеуге тапсырыс беріп, олар бекітілгеннен кейін таныстырылымын өткізу қажет. Әр ел логотип пен бойтұмар таңдауды әртүрлі ұйымдастырады. Ойындардың логотипі, бойтұмары және ұранына барлық ниет білдірушілер арасында конкурс жариялайды.
Символдармен қатар, ұйымдастыру комитеті спорт нысандарын дайындауды және жарысты өткізуге қатысты басқа да жұмыс мәселелерін үйлестіреді.
Бұған дейін Алматының қай стадиондарында 2029 жылғы қысқы Азия ойындарын қабылдай алатыны туралы жазған едік.
