Павлодар облысында су тасқыны кезеңіне дайындықтың белсенді кезеңі басталды – Сілеті өзенінде қауіпті кептелістердің алдын алу және су деңгейінің күрт көтерілуіне жол бермеу үшін мұз жарылды.
Мұз қайда және не үшін жарылады?
Өңірлік ТЖД баспасөз қызметі хабарлағандай, жұмыстар Ақтоғай ауданында жүргізілді, мұнда жағалаудағы елді мекендерді су басу қаупі әлі де жоғары.
Жарылыстар өзен арнасы тарылатын үш учаскеде жасалды. Дәл осындай жерлерде мұз жиі жиналып, соның салдарынан су деңгейі күрт көтеріліп, арнасынан шығып кетуі мүмкін. Жұмыстың жалпы ауданы шамамен 1000 шаршы метрді құрады. Мұз қабатын босаңсыту үшін 126 килограмм жарылғыш зат пайдаланылды.
Мұзды жару — сең жүру кезеңінде кептелістерді болдырмаудың ең тиімді әдістерінің бірі. Осындай жұмыстардан кейін су еркін өтеді, ал су басу қаупі төмендейді.
Қауіпті аймақта – Шолақсор ауылы
Сілеті өзені үш облыстың – Ақмола, Павлодар және Солтүстік Қазақстан облыстарының аумағы арқылы ағып өтеді. Құтқарушылар Шолақсор ауылына ерекше көңіл бөлуде — мұнда өзен арнасы елді мекенге жақын орналасқан, сондықтан қолайсыз жағдай туындаса, су басуы мүмкін.
«Жарылыс жұмыстары мұз қабатын алдын ала босаңсытуға және кептелістердің пайда болуына жол бермеуге мүмкіндік береді. Бұл сең жүру кезінде судың қауіпсіз өтуін қамтамасыз етуге және елді мекендерді су басу қаупін азайтуға көмектеседі», – деп хабарлады Павлодар облысы ТЖД.
Жарылыстан кейін не болады?
Ведомство өкілдері таяу уақытта өзенде құтқарушылардың жедел тобы кезекшілік ететінін атап өтті. Олар мұздың жиналып қалмауы үшін оны қосымша ұсақтап, кесетін болады.
Барлық іс-шаралар су тасқыны кезеңіне дайындықтың бекітілген жоспары бойынша жүргізілуде. Жоспарды құру кезінде өткен жылдардың тәжірибесі, ауа райы болжамдары мен жергілікті жердің ерекшеліктері ескерілген.
