Ресей рублі құнсызданып жатыр

Соңғы күндері Ресей валюта нарығында айтарлықтай өзгерістер байқалып жатыр. 18 наурыздағы кешкі сауда-саттық рубльдің бірқалыпты әлсіреуінен нақты құлдырауға ұласты. Астана уақытымен бүгін сағат 13:55-тегі жағдай бойынша USD/RUB бағамы 86,1 рубльге жетті. Осылайша рубль жыл басынан бері 8,46% құнсызданды. Бұл Freedom Finance Global сарапшысы Наталья Мильчакова болжаған апта соңындағы дәлізден (82–84 рубль) жоғары болып тұр. Kursiv Media көрші ел валютасы неліктен құнсызданып жатқанын саралап көрді.

Нарықтағы қазіргі көрсеткіштер:

• Юань: 12 рубльден асып, 2025 жылдың қазан айындағы деңгейге көтерілді.
• Доллар: 83-86 рубль аралығында бекітіліп жатыр
• Еуро: 95 рубль шегінен асты.

Рубльдің құлдырауына әсер еткен негізгі факторлар

Сарапшылардың пікірінше, бұл жағдай бірнеше сыртқы және ішкі факторлардың жиынтығынан туындап отыр:

АҚШ ФРЖ-ның шешімі және «күшті доллар» факторы 18 наурызда АҚШ-тың Федералды резервтік жүйесі (ФРЖ) өз отырысының қорытындысын жариялады. Базалық мөлшерлеме 3,5–3,75% деңгейінде қалды. Мұнай бағасының (Brent және WTI) барреліне 110 доллар маңында саудалануы инфляциялық қысымды арттырып, доллардың әлемдік деңгейде нығаюына жағдай жасап отыр. Сондай-ақ ФРЖ тізгінін ұстайтын Кевин Уорштың қатаң монетарлық саясатты қолдаушы екендігі де долларға қосымша қолдау көрсетіп отыр.

РФ Орталық банкінің монетарлық саясаты. 20 наурызда Ресей Орталық банкінің кезекті отырысы өтеді. Нарық қатысушылары базалық мөлшерлеме (кезекті 0,5 пайыздық тармаққа) төмендейді деп күтеді. Мөлшерлеменің төмендеуі, әдетте, ұлттық валютаның тартымдылығын азайтып, оның әлсіреуіне әкеледі.

Экспорттаушылар мен Қаржы министрлігінің әрекеті. Ресей Қаржы министрлігінің наурызда валюталық интервенциялардан бас тартуы бастапқыда экспорттаушыларға қолдау көрсетті. Дегенмен министрліктің шетел валютасын ірі көлемде сатып аламыз деген сәуірдегі мәлімдемесі рубльге алдын ала қысым түсіріп отыр.

Геосаяси белгісіздік. РФ, АҚШ және Украина арасындағы келіссөздердегі ұзаққа созылған үзіліс инвесторлардың сеніміне нұқсан келтірді. Нарық бұған дейін қақтығыстың тез арада шешілуіне үміт артқан, ендігі жағдай қалай өзгеретіні белгісіз.

Алдағы болжам

Наталья Мильчакованың талдауына сүйенсек, алдағы күндері валюта бағамы мынадай дәліздерде қалыптасуы мүмкін:

• USD/RUB: 82–84 рубль (қазіргі қарқынмен 85-тен жоғары сақталуы ықтимал);
• EUR/RUB: 94–96 рубль;
• CNY/RUB: 11,6–12,2 рубль.

Рубльдің бұдан былайғы тағдыры 20 наурыздағы Орталық банктің шешіміне және мұнай бағасының динамикасына тікелей байланысты болады. Егер мұнай 100 доллардан жоғары тұрақталса, бұл бюджет түсімдерін арттырғанымен, инфляция мен импорттық шығындардың өсуіне әсер етуі мүмкін.