Астанада көлікті айыптұрақта сақтау және эвакуациялау ақылы болады
Енді елорда тұрғындары айыппұл тұрағы мен автокөлікті эвакуациялау үшін ақы төлеуі мүмкін. Бұл туралы Астана мәслихаты депутаттарының отырысы барысында мәлім болды.
Мәслихат отырысы кезінде Көлік және жол-көлік инфрақұрылымын дамыту басқармасының басшысы Асхат Қарағойшин Астанада автотұрақтарды ретке келтіру жоспары туралы айтты. Оның айтуынша, енді көліктерді қоюға рұқсат етілетін орындар мен аймақтар нақты белгіленеді.
Эвакуация үшін және айыппұл тұрағы үшін тарифтер
Жаңа ережелерге сәйкес, енді көлікті эвакуациялау үшін тұрғындар 3 АЕК (12 900 теңге) төлеуге міндетті болады. Мамандандырылған тұрақта сақтау да ақылы болмақ. Төлем мөлшері көлік түрі мен тұру мерзіміне байланысты:
- мотоциклдер – бірінші күнге 1 АЕК (4325 теңге), кейін 2 АЕК (8650 теңге);
- үш дөңгелекті көлік құралдары мен квадроциклдер – бірінші күнге 1,5 АЕК (6487 теңге), кейін 3 АЕК (12 900 теңге);
- жеңіл автокөліктер – 3 АЕК (12 900 теңге), кейін 5 АЕК (21 625 теңге);
- 3,5 тоннаға дейінгі жүк көліктері – 5 АЕК (21 625 теңге), кейін 7 АЕК (30 275 теңге);
- тіркемелер – 2 АЕК-тен (8650 теңге) 5 АЕК-ке дейін.
Сондай-ақ Астанада шлагбаумдар мен қоршауларға қатысты да шаралар қабылданады. Енді оларды орнату алдын ала келісіліп, жедел қызметтердің өтуіне кедергі келтірмеуі тиіс.
«Бұл ережелер жол қозғалысы қауіпсіздігін арттыруға, автотұрақ орындарын жүйелеуге және эвакуациялау процесінің ашықтығын қамтамасыз етуге бағытталған», – деді Карағойшин.
Тарифтер 23 сәуірден бастап күшіне енеді, алайда 15 мамырға дейін тұрғындарға тек ескерту ғана жіберіледі, айыппұл салынбайды. Бұл шешім жүргізушілердің жаңа жүйеге бейімделуі үшін қабылданған.
Еске сала кетейік, Алматыда көп деңгейлі автотұрақтар салынбайтын болды.
