Алматыдағы әл-Фараби даңғылында болған адам өліміне әкеп соққан атышулы жол-көлік оқиғасы ерекше бақылауда, деп хабарлады ІІМ.
Министр Ержан Саденов қаза тапқандардың туыстары мен жақындарына көңіл айтып, жол апаты фактісі бойынша қылмыстық іс қозғалғанын еске салды. Күдікті жүргізушіге қатысты соттың санкциясымен қамауға алу түріндегі бұлтартпау шарасы таңдалды.
«Ол заңның барлық қатаңдығы бойынша жазасын өтейді», – деп сендірді Сәденов.
Оның тапсырмасы бойынша Алматыға қауіпсіздік департаментінің, Әкімшілік полиция комитетінің және Жеке құраммен жұмыс департаментінің қызметкерлері жіберілді. Қазіргі уақытта жан-жақты тексеру жүргізілуде. Бұдан бөлек, ықтимал заң бұзушылықтар туралы дәлелдер бойынша қылмыстық істер қозғалды. Бірқатар басшылар қызметтерінен босатылды.
«Барлығына құқықтық баға беріледі. Ешкім жауапкершіліктен жалтармайды. Заң барлығына ортақ», – деп атап өтті министр.
Алматыдағы әл-Фараби бойындағы ЖКО
21 наурызға қараған түні әл-Фараби даңғылында адам өліміне әкеп соққан ЖКО болды. Батыс бағытта келе жатқан Zeekr электромобилі жоғары жылдамдықпен қарсы жолаққа шығып кетіп, қарсы келе жатқан Mercedes-пен соғысқан. Жол апаты салдарынан Mercedes жүргізушісі мен оның екі жолаушысы – 20 және 22 жастағы қыздар қаза тапты. Олардың барлығы оқиға орнында көз жұмды. Zeekr жүргізушісі аман қалды, ол түрлі жарақаттармен ауруханаға жеткізілді. ЖКО фактісі бойынша 345-баптың 4-бөлігімен қылмыстық іс қозғалды. Кінәлі адам 10 жылға дейін бас бостандығынан айырылуы мүмкін.
