Павлодарда патруль қызметкерлері ірі мөлшердегі қарызы бар көлікті анықтады. Люкс санатындағы Cadillac Escalade кроссоверінің жиналған берешегі миллиондаған теңгеге жеткен. Бұл туралы Polisia.kz хабарлады.
Полицейлер мұны «Борышкер» профилактикалық іс-шарасы барысында анықтады. Cadillac Escalade-ты деректер базасында тексерген кезде, бұл автокөлікке иелік ететін ұйымның 34 млн теңгеден астам өтелмеген қарызы бар екені белгілі болды.
«Жеке сот орындаушысының қаулысы негізінде автокөлік арнайы тұраққа қойылды«, – деді Павлодар қаласы ПБ патрульдік полиция батальоны қызметінің инспекторы Жандос Мейрамғазы.
«Борышкер» рейді – полиция, прокуратура және сот орындаушыларының бірлескен операциясы. Негізгі мақсат – әкімшілік қаулылардың орындалуын қамтамасыз ету және берешектерді өндіру.
Полиция азаматтарға айыппұлдар мен өзге де берешектерді уақытылы төлеу қажеттігін ескертті.
Еске салайық, қазақстандық автокөлік иелері 2025 жылға арналған көлік салығын 1 сәуірге дейін төлеуге міндетті. Төлем сомасы әр көлік үшін жеке есептеледі. Ол көліктің қозғалтқыш көлеміне байланысты анықталады әрі айлық есептік көрсеткіш (АЕК) негізінде есептеледі.
