Қазақстанда бір жылда жол апатынан 2,4 мыңға жуық адам қаза тапты
2025 жылы Қазақстанда 36 мыңнан астам жол-көлік оқиғасы тіркелді. Бұл 2024 жылға қарағанда 14,4%-ға көп. Бұл туралы Денсаулық сақтау министрлігі хабарлады.
Жол апаттарынан 51 мыңнан астам адам зардап шегіп, 2 330-ы қаза тапқан.
Жол-көлік оқиғалары мен зардап шеккендердің саны артқанына қарамастан, өлім-жітім көрсеткіші төмендеген. 2024 жылмен салыстырғанда өлім көрсеткіші 9,7%-ға азайған.
Барлық жол-көлік оқиғасының үштен бірі Алматы қаласы мен Алматы облысында тіркелген. Ең апатты өңірлер антирейтингінде:
- Алматы қаласы – 8 954 жағдай
- Алматы облысы – 5 987 жағдай
- Жамбыл облысы – 3 276 жағдай
- Ақтөбе облысы – 3 053 жағдай
- Атырау облысы – 2 785 жағдай
Жедел медициналық көмек қызметінің мәліметтері бойынша, жарақаттар бойынша түскен шамамен 796 мың шақыртудың 44 мыңы (5,6%) жол-көлік оқиғаларымен байланысты.
«Бригадалардың орташа келу уақыты халықаралық ұсыныстарға сәйкес – қалаларда шамамен 8 минут, ауылдық жерлерде 9 минут. «Алтын сағат» аясында зардап шеккендер 34 минут ішінде медициналық мекемелерге жеткізіледі. Бұл өлім-жітімді азайтуға және жарақат салдарының ауырлығын төмендетуге маңызды рөл атқарады»,– деп атап өтті Денсаулық сақтау министрлігі.
Осыған дейін депутат Бақытжан Базарбек Алматыда үш кісінің өлімімен аяқталған жол-көлік оқиғасы жіті тергеліп, жауапты басшылардың бәрі қызметінен кетуі керек деп мәлімдеген еді.
