Жетісу облысында бірнеше алаяқтық дерегі бойынша айыпталған тұлғаларға қатысты қылмыстық істі тергеу аяқталды. Бұл туралы өңірлік полиция департаменті хабарлап, іс материалдарының сотқа жолданғанын мәлімдеді.
Тергеу мәліметінше, қылмыстық схеманың құрбаны 37 адам болған. Күдіктілер – Алматы облысы Талғар ауданы Гүлдала ауылының 31 жастағы тұрғыны мен Талдықорған қаласының 25 жастағы тұрғыны.
Алдын ала мәліметтерге сәйкес, олар интернет-дүкендер арқылы тауарлық несие рәсімдеу жолымен қаржы жымқыру схемасын ұйымдастырған. 2024 жылдың қазан айында күдіктілердің бірі интернет қолданушыларын алдауға бағытталған жоспар құрғаны анықталған.
Алаяқтық схема бойынша азаматтарға тауарлық несие рәсімдеп, кейін оны «қолма-қол ақшаға айналдыру», қарызды толық жабу және қосымша сыйақы төлеу ұсынылған. Қылмысты іске асыру үшін туыстарының атына тіркелген банктік шоттар пайдаланылған.
Сондай-ақ, заңсыз әрекетке Алматыдағы микроқаржы ұйымдарының бірінің қызметкері тартылған. Ол қаржылық сауаттылығы төмен әрі материалдық жағдайы қиын адамдарды іздеп, оларды осы схемаға қатысуға үгіттеген. Күдіктілер азаматтарға бұл әрекет интернет-дүкендердің «рейтингін көтеруге» көмектеседі деп түсіндірген.
Бастапқы кезеңде күдіктілер өз міндеттемелерін ішінара орындап, кейбір төлемдерді жасап, несиелердің бір бөлігін өтеген. Осы арқылы олар жәбірленушілердің сеніміне кірген. Алайда кейіннен төлемдер тоқтатылып, алынған қаражат толықтай иемденілген.
Полиция мәліметінше, жәбірленушілер тек өздері ғана емес, туыстары мен таныстарын да осы схемаға тартқан. Бұл алаяқтық ауқымының кеңеюіне себеп болған.
Қылмыстық әрекеттің салдарынан келтірілген жалпы шығын көлемі 80 миллион теңгеден асқан.
Құқық қорғау органдары азаматтарды интернеттегі күмәнді табыс көздеріне сенбеуге шақырады. Сондай-ақ жеке мәліметтерді бөгде адамдарға бермеу және күмәнді ұсыныстар арқылы несие рәсімдеуден бас тарту қажеттігін ескертеді.
