Қарағандыда 15 жасар қызды күйеуге берген: сот үкімді өзгеріссіз қалдырды
Қарағанды облысында 15 жасар қызды зорлау туралы жан түршігерлік іс бойынша апелляциялық шағымды қарау аяқталды. Сотталушы орындығына баланы «шариғат заңдары бойынша» әйелдікке алған 38 жастағы ер адам отырды. 2025 жылдың қазан айында сот ер адамды 17 жылға бас бостандығынан айырған болатын, алайда сотталушы үкімге шағым түсіруді ұйғарды.
Қарағандыда анасы мен өгей әкесі 15 жасар қызды қарсылығына қарамастан күйеуге берген. Өз еркінен тыс ол жалдамалы пәтерде ересек ер адаммен бірге қалған, ал ер адам оның жасын біле тұра, күш көрсеткен. Іс материалдарына сәйкес, 2025 жылдың наурыз айынан бастап сотталушы баланы бірнеше рет жақындыққа мәжбүрлеген.
2025 жылғы 16 қазанда мамандандырылған ауданаралық сот ер адамды ҚР ҚК 120-бабы («Кәмелетке толмаған баланы зорлау») бойынша кінәлі деп танып, 17 жылға бас бостандығынан айыру жазасын тағайындады. Сондай-ақ, оған білім беру саласында жұмыс істеуге және балалармен байланысты лауазымдарды атқаруға өмір бойына тыйым салынды.
2026 жылғы 1 сәуірде Қарағанды облыстық сотының сот алқасы сотталған адам мен оның адвокаттарының апелляциялық шағымдарын қарады.
«Бірінші сатыдағы соттың үкімі өзгеріссіз, ал апелляциялық шағымдар қанағаттандырусыз қалдырылды», – деп хабарлады Қарағанды облыстық сотының баспасөз қызметі.
Осылайша, бірінші сатыдағы соттың үкімі заңды күшіне енді.
Сондай-ақ, қыздың заңды өкілі моральдық зиянды өтеу туралы азаматтық талап арыз бергені хабарланды. Сот оны ішінара қанағаттандырып, 3 млн теңге өндіріп алды. Бұдан бөлек, сот алқасы Қарағанды облысының прокурорына жеке қаулы шығарды.
