Депутат Дәулет Тұрлыхановтың ұлы түрмеден шықты

Мәжіліс депутаты Дәулет Тұрлыхановтың ұлы Нұрасыл Болат жазасын толық өтеп, бостандыққа шықты. Бұл ақпаратты ҚР ІІМ Қылмыстық-атқару жүйесі комитеті (ҚАЖК) ресми түрде растады.

ҚАЖК-нің хабарлауынша, сотталған азамат сот белгілеген жаза мерзімін толық аяқтауына байланысты босатылды. Ол бұған дейін пробациялық бақылау ережелерін бұзғаны үшін бас бостандығынан айыру орнына ауыстырылған болатын.

Естеріңізге сала кетейік, шулы оқиға 2023 жылдың ақпанында Алматыда орын алды:

Нұрасыл Болат заңгерлер ерлі-зайыпты Олег пен Анна Черновтарды соққыға жықты. Заңгерлер Нұрасыл агрессия көрсеткен қызға араша түспек болған. Оқиға кезінде Нұрасыл Отардағы әскери бөлімде мерзімді қызметте болуы тиіс еді, бірақ ол заңсыз түрде қалада жүрген. Бастапқыда сот оған 1 миллион 700 мың теңге айыппұл салған еді.

Жазаның қатаңдатылуы және «тойдағы» жанжал

2024 жылдың мамырында Жоғарғы сот үкімді өзгертіп, оған 2 жылға бас бостандығын шектеу жазасын кесті. Алайда, сол жылдың қазан айында пробациялық бақылауда жүрген Нұрасыл Болаттың түнгі уақытта тойда жүрген видеосы желіге тарап кетті. Осы ереже бұзушылықтан кейін оның жазасы нақты түрме мерзіміне ауыстырылған еді.