2026 жылдың алғашқы тоқсанындағы тауар нарығындағы жағдай Қазақстанның қор нарығы үшін негізгі бағдаршам болды. Шикізат бағасының өсуі ұлттық компаниялардың капиталдануына тікелей әсер етті. Kursiv Media 2026 жылдың алғашқы тоқсанындағы KASE нарығындағы өтімді акциялардың динамикасын зерттеп көрді.
Мұнай: Энергетикалық сектордың ғажап өсімі
Мұнай бағасының жыл басынан бері 75,13%-ға өсуі – жаһандық деңгейдегі өте үлкен көрсеткіш. Бұл серпіліс KASE индексіндегі екі негізгі ойыншының өсуіне негіз болды:
- ҚазМұнайГаз (KMGZ) +44,62%: Мұнайдың 75%-дық өсіміне қарамастан, КМГ акциялары 44,6%-ға өскен. Бұл «operating leverage» әсерін көрсетеді. Акция бағасы шикізат бағасының артынан ілесіп келеді, бірақ толық потенциалына әлі жетпеген болуы мүмкін.
- ҚазТрансОйл (KZTO) +29,33%: Мұнай бағасы жоғары болғанда, экспорт көлемі мен тасымалға сұраныс артады. Мұнайдың 75%-дық раллиі KZTO акцияларының тартымдылығын арттырып, оны «көлеңкеден» алып шықты.
Алтын: Консервативті өсім және Солидкор феномені
Алтын бағасының жыл басынан бері 4,44%-ға өсуі нарықтағы қалыпты жағдайды білдіреді. Алтын әдетте инфляциядан қорғану құралы ретінде қарастырылады. Алайда бұл жерде бір қызық жайт бар:
- Solidcore Resources (POLY) +21,08%: AIX қор биржасындағы компания. Алтынның өзі небәрі 4,44%-ға өссе де, компания акциялары 21%-дан астам табыс әкелген. Бұл компанияның алтын бағасына қарағанда «жоғары бетаға» (сезімталдыққа) ие екенін және инвесторлардың компанияның ішкі тиімділігіне немесе жаңа жобаларына сенетінін көрсетеді.
- AltynGold (GB ALTN) -2,06%: Алтын бағасы өскенімен, компанияның теріс аймақта қалуы шикізат бағасының әсерін компанияның ішкі мәселелері (өндіріс шығындары немесе есептілік) жауып кеткенін аңғартады.
«Аутсайдерлер» және нарықтағы түзету
Тоқсан қорытындысы бойынша кейбір ірі ойыншылардың акциялары айтарлықтай арзандады:
- ForteBank (ASBN): -27,41% көрсеткішімен ең көп шығынға ұшыраған актив болды. 17 теңгеден 12,34 теңгеге дейін құлдырау инвесторлардың банк секторындағы кейбір тәуекелдерден қашқанын аңғартады.
- Air Astana (AIRA): Авиатасымалдаушы акциялары 20,31%-ға арзандады. Ұлыбританияның қорғаныс алыбы BAE Systems компаниясының Air Astana капиталынан толық шығуы – қазақстандық авиация нарығындағы ең ірі оқиғалардың бірі. Бұл тек акционерлердің ауысуы емес, компанияның 20 жылдан астам уақытқа созылған стратегиялық моделінің өзгеруі.
- Kaspi.kz (KSPI): Нарықтың фавориті саналатын Kaspi акциялары 12,89%-ға төмендеді. Бұл көбінесе инвесторлардың пайданы бекітуі (profit taking) немесе финтех секторындағы бәсекелестіктің күшеюімен түсіндіріледі.
Тұрақтылық белдеуі: Телеком және Халық Банк
- Халық Банкі (HSBK), Қазақтелеком (KZTK) және Kcell (KCEL): Бұл компаниялар 0,2% – 2,3% аралығында өте баяу өсім көрсетті. Бұл активтер қазіргі таңда «қорғаныс активтері» ретінде қызмет етіп тұр: олар күрт өспейді, бірақ нарық құбылғанда қатты құламайды.
- 2026 жылдың бірінші тоқсанында Қазақстанның қаржы технологиялары секторы айтарлықтай түзетуді (correction) бастан кешірді. Freedom Holding холдингі нарықтағы жалпы пессимизмге қарамастан, трендке қарсы жүзіп, оң динамика көрсетіп отыр. Үш ай ішінде KASE биржасындағы акция бағасы 127,2 доллардан 141,5 долларға дейін, яғни 11,24%-ға қымбаттады.
