Түркістан облысында бірнеше күн бұрын жоғалып кеткен 2010 жылы туған Хасен Мардан Ғалымжанұлы аман-есен табылды. Тәртіп сақшыларының жедел іздестіру шараларының нәтижесінде жасөспірім Шымкент қаласынан табылды.
Жасөспірім 21 наурыз күні Ордабасы ауданындағы үйінен шығып, Түркістан қаласына достарымен қыдыруға кеткен. Алайда содан кейін жақындарымен байланыс үзіліп, із-түссіз кеткен. Ата-анасының айтуынша, бала телефонын үйіне қалдырып кеткендіктен, онымен хабарласу мүмкін болмаған.
Іздестіру жұмыстары
Түркістан облыстық полиция департаменті мен қалалық басқарманың жедел уәкілдері дереу іске кірісті:
Бейнебақылау камералары мұқият зерделенді. Түркістан қаласының әрбір көшесі мен ауласы тексерілді. Іздеу жұмыстары кейін Шымкент қаласына дейін созылды.
Нәтижесінде, 15 жастағы Мардан Шымкенттен табылып, полиция қызметкерлері оны ата-анасына аман-есен табыстады.
Бала қайда болды
Баланың әпкесінің айтуынша, жасөспірім қазіргі уақытта қатты стресс жағдайында. Ол өзінің қайда болғаны және не себепті мұндай қадамға барғаны туралы әзірге тіс жарып айтпай отыр. Сондықтан алдағы уақытта баламен кәсіби психологтар тиісті жұмыс жүргізеді.
Тәртіп сақшылары ата-аналарға жасөспірімдермен жақын сөйлесіп, олардың ішкі күйзелісі мен мәселелеріне дер кезінде көңіл бөлу қажеттігін тағы да еске салады.
Айта кетейік, бұдан бөлек Түркістанда өзенге құлаған 8 жастағы бала бір аптадан бері табылмай жатыр.
