Бүгін, 3 сәуір күні бокстан Азия чемпионатының жекпе-жектері өтеді. Қазақстан құрамасының үздіктері, ағайынды Махмұд пен Төрехан Сабырхандар жауапты жекпе-жектерін өткізеді.
Шаршы алаңдағы тартысты доданы QAZSPORT телеарнасы тікелей эфирде көрсетеді. Күндізгі және кешкі сессияда отандастарымызды маңызды сынақ күтіп тұр.
Күндізгі сессия (09:00): Төрехан Сабырхан vs Шамшиер Саидов
70 келі салмақ дәрежесінде бақ сынайтын жас дарын, әлем чемпионы Төрехан Сабырхан ширек финалда тәжікстандық Шамшиер Саидовпен қолғап түйістіреді.
Бұл кездесу оңай болмайтыны анық. Себебі Шамшиер Саидов қазақ боксшыларына жақсы таныс «ыңғайсыз» қарсылас. Ол 2023 жылы өткен «Елорда Кубогында» бір емес, үш бірдей отандасымызды (Елнұр Сүйінбай, Темірхан Тезек, Нұрқадам Әбдіреш) жеңіп, турнирдің алтынын иеленген болатын.
Кешкі сессия (14:00): Махмұд Сабырхан vs Шахзод Мұзафаров
Кешкі сессияда бокс әлемінде «Қазақ Ломаченкосы» атанып кеткен, екі дүркін әлем чемпионы Махмұд Сабырхан жарыс жолына шығады. Оның қарсыласы өзбекстандық талантты боксшы, жастар арасындағы әлем чемпионы Шахзод Мұзафаров.
Бұл қос боксшының арасындағы төртінші кездесу болмақ. Бұған дейінгі үш жекпе-жекте де Махмұд айқын басымдық танытқан:
| Жыл | Турнир | Нәтиже |
| 2024 | Азия чемпионаты (Финал) | Махмұд Сабырхан жеңісі (4:1) |
| 2022 | Азия чемпионаты (Жартылай финал) | Махмұд Сабырхан жеңісі (5:0) |
| 2022 | «Елорда Кубогы» (Жартылай финал) | Махмұд Сабырхан жеңісі (5:0) |
Дегенмен өзбек боксшысының реванш алуға тырысатыны сөзсіз, сондықтан Махмұд үшін бұл психологиялық тұрғыдан маңызды айқас.
