Өткен апта жаһандық нарықтар үшін біршама құбылмалы болды. Мұнай мен алтын бағасының төмендеуі фонында теңгенің нығаюы және жекелеген қазақстандық компаниялардың акцияларының өсуі байқалды.
Шикізат және валюта: Теңгенің нығаюы
- Brent мұнайы: Бір баррель үшін $111,29 деңгейінде тұрақтап, апта ішінде 2,29%-ға арзандады. Таяу Шығыстағы және тұтастай аймақтағы соңғы әскери іс-қимылдар аясында әлемдік мұнай бағасы құбылмалылық танытуда. Әсіресе, Таяу Шығыстағы, атап айтқанда Сауд Арабиясы, Ирак және аймақтағы өзге де ірі өндіруші елдердегі жеткізілімдердің іркілуіне байланысты Brent маркалы мұнай бағасы айтарлықтай қысымға ұшырады. Мұндай құбылмалылық WTI мен Brent маркалары арасындағы баға алшақтығын ұлғайтты, бұл геосаяси тәуекелдердің өскенін айғақтайды.
- Алтын: Баға $4 678,0 деңгейіне дейін 1,72%-ға түсті. Инвесторлардың тәуекелді активтерге (акцияларға) қайта бет бұруы алтынға деген сұранысты азайтты.
- USD/KZT: Теңге айтарлықтай нығайып, доллар бағамы 469,85 теңгені құрады (-2,81%). Бұл соңғы уақыттағы 480-490 диапазонынан кейінгі маңызды секіріс.
Жаһандық индекстер
Әлемдік нарықтарда оң динамика басым:
- S&P 500 (+0,41%): АҚШ-тың технологиялық секторының арқасында жаңа белестерді бағындыруда.
- FTSE 100 (+3,26%): Еуропалық инвесторлардың белсенділігі жоғары.
- МосБиржа (-2,18%): Ресейлік нарық санкциялық қысым мен ішкі экономикалық факторлар әсерінен құлдырауын жалғастыруда.
Қазақстандық қор нарығы (KASE)
KASE индексі апта ішінде 0,62%-ға төмендеп, 7 725,19 тармақты құрады. Индекске кірмейтін алайда өтімділігі жоғары акциялар айтарлықтай өсім көрсетті:
- Апта лидері – Freedom Holding Corp. (+7,07%): Инвесторлардың компанияның экожүйесіне және халықаралық жобаларына деген сенімі бағаны 151,51 долларға дейін көтерді.
- AltynGold (+4,63%): Алтынның әлемдік бағасы түскеніне қарамастан, компанияның ішкі өндірістік көрсеткіштері акция бағасын ұстап тұр.
- Air Astana (+1,53%): Өткен аптадағы құлдыраудан кейін, нарықта түзету болды.
- Аутсайдерлер: Kcell (-2,54%) және Kazatomprom (-1,11%). Уран бағасының уақытша коррекциясы «Қазатомөнеркәсіп» қағаздарына салқынын тигізді.
Freedom Broker: Иран басты назарда
Алдағы сессия қатысушыларының назарында геосаясат қала береді, бұл ретте жаңалықтар аясы сатып алушылар үшін қолайсыз бола бастады. Алдыңғы күнгі өсім АҚШ пен Иран арасындағы қақтығыстың жуырда аяқталуына деген үмітке негізделген еді. Алайда Вашингтонның соңғы мәлімдемелері бұл сценарийді нақты растамай отыр. Дональд Трамп әскери операцияның аяқталуға жақын екенін тағы да атап өткенімен, сонымен бірге алдағы апталарда соққылардың күшею мүмкіндігін де жоққа шығармады.
Бұл ретте Ормуз бұғазы төңірегіндегі риторика екіұшты күйінде қалып отыр. Ақ үй оны ашудың нақты жоспарын ұсынбады және іс жүзінде АҚШ өзін бұл бағытқа тәуелді деп санамайтынын аңғартуда. Осыған байланысты жаһандық мұнай жеткізілімдеріне төнетін қауіп сақталуда. Сонымен қатар, келіссөздер процесіне қатысты сигналдар да қарама-қайшы. Осылайша, нарықтардағы белгісіздік деңгейі әлі де жоғары. Осы жағдай аясында мұнай бағасы күрт көтеріліп, бұл инфляциялық күтулерді нашарлатып, мөлшерлемелерге сезімтал сегменттерге қысымды күшейте түсті.
