Таразда педагогты «жемқор» деп айыптаған әйел сот алдында жауап берді
Тараз қалалық сотында жергілікті арнайы мектеп-интернат мұғалімінің ар-намысын, қадір-қасиетін және іскерлік беделін қорғау туралы азаматтық іс қаралды.
Даулы оқиға 2024 жылдың қыркүйек айында басталған. Қала тұрғыны оқу орны директорының атына шағым жазып, онда педагогқа қатысты ауыр айыптар таққан. Ол мұғалімді «өсек таситын, тәрбиешілерге жала жабатын, ірі көлемде ақша жинайтын жемқор» деп атаған.
Мұндай мәлімдемелерден кейін мектеп басшылығы қызметтік тексеру жүргізді, алайда айыптаулардың ешқайсысы расталмады. Сот сараптамасы жауапкердің сөздері тек теріс сипатта екенін және педагогтың беделіне нұқсан келтіретінін анықтады.
Сот процесі кезінде де жауапкер тарап жемқорлық пен ақша жинау туралы айыптарын дәлелдейтін бірде-бір айғақ ұсына алмады. Осылайша, даулы мәлімдемелер негізсіз қауесет болып шықты.
Іс материалдарын зерделеген сот келесідей қорытындыға келді. Педагогтың жемқорлыққа қатысы бар және ақша жинайды деген ақпарат шындыққа жанаспайды. Негізсіз айып таққаны және іскерлік беделге нұқсан келтіргені үшін жауапкер кінәлі деп танылды.
Сот шешімімен жауапкер педагогтың пайдасына 100 000 теңге көлемінде моральдық зиян өтемақысын төлеуге міндеттелді.
