«Ордабасы» – «Атырау» матчында қателік жіберген төрешілер жұмыстан шеттетілді

Қазақстан футбол федерациясы (ҚФФ) ел чемпионатының төртінші турындағы даулы матчтан кейін қатаң шешім қабылдады. Төрешілер Санжар Ысқақов пен Татьяна Сорокопудова ұлттық жарыстарда қызмет көрсетуден уақытша шеттетілді.

Шеттетудің себебі неде?

Мұндай шешім Қазақстан Премьер-лигасының 4-туры аясында өткен «Ордабасы» мен «Атырау» командалары арасындағы кездесудің қорытындысы бойынша қабылданды. Төрешілер комитетінің мәліметінше, төрешілер ойын барысында дөрекі әрі ойын нәтижесінің өзгеруіне ықпал ететіндей қателіктер жіберген..

Федерацияның ұстанымы

Қазақстан футбол федерациясы төрешілерді шеттету деген қадамның уақытша сипатта екенін атап өтті. Шешімнің басты мақсаты – ішкі турнирлердегі төрелік сапасын арттыру және жарыстың әділ өтуін қамтамасыз ету.

«Төрешілердің жіберген қателіктері ойын нәтижесіне және екі ұжымның да жағдайына тікелей әсер етті. Сондықтан әділдік орнату мақсатында осындай шешім шығарылды», – делінген ресми хабарламада.

Еске сала кетейік, Қазақстан премьер-лигасының дәл осы 4-турында алматылық «Қайрат» «Астананы» ойсырата жеңген еді.