Ақтөбе облысының әкімдік ғимаратында орын алған ірі өрт оқиғасынан кейін қалпына келтіру жұмыстары мен ресми тергеу амалдары басталды. Облыс әкімі Асхат Шахаров оқиға орнындағы ахуалды жеке бақылауына алып, атқарылып жатқан іс-шараларды баяндады.
Өрттің зардаптары және ғимараттың қазіргі күйі
Әкімнің мәлімдеуінше, кеше болған тілсіз жау толықтай ауыздықталып, қазіргі уақытта жағдай тұрақты әрі бақылауға алынған.
Ғимараттың техникалық жағдайына келер болсақ, өрттен ғимараттың шатыры ғана зардап шеккен.
Ал алтыншы қабаттағы жұмыс кабинеттеріне келген нұқсан соншалықты үлкен емес. Бұл ретте айта кететін жайт, ғимаратта соңғы рет 2022 жылы күрделі жөндеу жүргізіліп, жұмыс бөлмелері толық жаңартылған. Қазіргі таңда кейбір қабаттарда электр жарығы берілді, ал қалған бөліктерінде желілерді қалпына келтіру жұмыстары жүріп жатыр.
Тергеу амалдары мен арнайы комиссияның жұмысы
Өрттің шығу себептерін анықтау үшін арнайы комиссия құрылды. Әкімнің айтуынша, мәселе бойынша қылмыстық іс қозғалып, тиісті тергеу шаралары басталған. Қазіргі уақытта мамандар мен сарапшылар өрттің неден шыққанын және ғимараттың техникалық тұтастығын зерттеп жатыр.
«Бұл мәселе менің жеке бақылауымда. Жедел штаб мүшелерімен бірге нақты іс-қимыл жоспары бекітілді. Барлық жұмыс кезең-кезеңімен атқарылады», – деп атап өтті Асхат Шахаров.
Жұмыс режимі: мемлекеттік қызмет тоқтаған жоқ
Өрттен кейінгі тазалау жұмыстарына байланысты әкімдіктің 600-ге жуық қызметкері уақытша қашықтан жұмыс істеу форматына ауыстырылған. Дегенмен мемлекеттік қызмет көрсету процесі тоқтамаған.
Түстен кейін әкімдік аппараты мен басқарма мамандарының басым бөлігі жұмыс орнына қайта оралып, мекеме қалыпты жұмыс режиміне көшеді деп күтіліп отыр.
Еске сала кетейік, 7 сәуір күні сағат 20:21 де Ақтөбе облысының әкімдігінің шатыры өртке оранған еді.
