Астанадағы тұрғын үйде өрт шығып, үш бала қайтыс болды. Қаланың төтенше жағдайлар департаментінің хабарлауынша, құтқарушылар оқиға орнына барған кезде пәтер толық өртеніп жатқан.
«ТЖМ оқиға орнына жедел жетті. Алғашқы бөлімше келген кезде пәтер аумағы жанып жатқан. Пәтер металл есікпен жабылған, екі құлып орнатылған, оны құтқарушылар арнайы құралдардың көмегімен бұзып ашты.
Өртті сөндіру барысында жанып жатқан пәтерден бір әйел құтқарылып, жедел жәрдем бригадасына тапсырылды. Оқиға орнынан үш кәмелетке толмаған баланың мәйіті табылды», – деп хабарлады департамент.
Сондай-ақ тұрғын үй ауласында автокөлік толы болған.
Өрт фактісі бойынша сотқа дейінгі тергеу басталып, оқиғаның мән-жайы мен шығу себебін анықтау үшін сараптамалар тағайындалды.
Әйел ауыр хәлде жатыр
Астананың денсаулық сақтау басқармасының хабарлауынша, балалардың анасы №1 Көпсалалы қалалық ауруханада жатыр.
«Қазір науқас реанимация және қарқынды терапия бөлімінде жатыр. Жағдайы ауыр» – дейді басқарма мамандары.
Айта кетейік, қайғылы жағдай 12 сәуірге қараған түні болған.
