Ақмола облысында сот әйел адамды суррогат ана болу процедурасының бұзылуына байланысты ерлі-зайыптыларға ақшаны қайтаруға міндеттеді.
Іс материалдарына сәйкес, 2024 жылы ерлі-зайыпты Е. азаматша Д.-мен суррогат ана болу туралы келісімшарт жасаған. Құжатта бала бітудің (ұрықтандырудың) екі әрекеті қарастырылған. Бірінші әрекет сәтсіз аяқталған соң, ерлі-зайыптылар екінші әрекетке дайындықты жалғастырып, әйелге тексерулерге, медициналық препараттарға, жол жүру мен тамақтануға 500 мың теңгеден астам қаражат аударған.
Алайда 2025 жылғы наурызда процедура өтпей қалды – суррогат ана клиникаға келмеген. Кейін ол бас тартуын кардиолог пен терапевтің қорытындыларын ұсына отырып, медициналық қарсы көрсетілімдермен түсіндіруге тырысты.
Сот бұл уәждерге сын көзбен қарап, тексерулердің келісімшартта қарастырылмаған бөтен ұйымдарда және ақшалай қаражатты алғаннан кейін жүргізілгенін көрсетті. Бірінші сатыдағы сот талапкерлердің материалдық шығынды өтеу туралы талаптарын негізді деп таныды.
Жауапкерден 550 мың теңге, сондай-ақ, процедураға дайындыққа жұмсалған шығындар өндірілді. Сонымен қатар, апелляциялық алқа моральдық зиянды өтеу бөлігіндегі шешімді қайта қарады.
«Келісімшартта эмбрионды сақтау шарттары көрсетілмеген және Д. оның сақталуына жауапты емес. Ерлі-зайыптылар эмбрионды ЖШС-мен жасалған келісімшарт бойынша сақтаған және олардың өтініші негізінде эмбрион жойылған. Эмбрионды жою туралы шешім Д.-ның іс-әрекетінің салдары екендігі туралы дәлелдер сотқа ұсынылмаған. Д. талап қоюшылардың тек мүліктік құқықтарын бұзған», – деп хабарлады соттан.
Нәтижесінде материалдық шығынды өндіру күшінде қалдырылып, моральдық зиянды өтеу туралы талап күшін жойды. Қаулы заңды күшіне енді.
