Wall Street Journal басылымының хабарлауынша, Біріккен Араб Әмірліктері АҚШ-тан қаржылық қолдау сұрап, келіссөздер жүргізе бастады. Абу-Даби билігі Иран мен Израиль арасындағы соғыс өршіп кеткен жағдайда ел экономикасын қорғау үшін Вашингтоннан нақты кепілдіктер алғысы келеді. Бұл қадам әсіресе Ормұз бұғазының жабылуы немесе мұнай бағасының күрт өсуі сияқты ең қиын сценарийлерден сақтану үшін жасалып отыр.
Қандай көмекке мұқтаж?
Екі ел арасындағы талқылаулар соңғы күндері басталды. Келіссөздердің басты тақырыбы -төтенше жағдайда ақшалай көмек беру, мұнай нарығын тұрақтандыру механизмдері немесе тікелей қаржылық кепілдіктер. Мұндай шаралар соғыс салдарынан туындауы мүмкін ұзақ мерзімді үзілістер кезінде БАӘ экономикасын құлдыраудан сақтап қалуға бағытталған.
Энергетикалық инфрақұрылымға төнген қауіп
БАӘ экономикасы қазірдің өзінде Иранның әуе шабуылдарынан зардап шегіп үлгерді. Ақпан айының соңында басталған шабуылдар кезінде ADNOC компаниясының Хабшандағы газ нысандарында өрт шығып, Шығанақ аймағында бірнеше дрон оқиғалары тіркелген. Бұл жағдайлар елдің энергетикалық қауіпсіздігіне және мұнай нарығының тұрақтылығына тікелей қауіп төндіріп отыр.
Экономика мұнайға тәуелді
Әмірліктер экономикасы мұнай экспортына, шетелдік инвестициялар мен туризмге қатты тәуелді. Егер қақтығыс ұзаққа созылса, ел үлкен қысымға тап болуы мүмкін. БАӘ-нің өз қаржылық қоры өте үлкен болса да, ресми өкілдер АҚШ-тың «қауіпсіздік жастығын» иелену арқылы инвесторлардың сенімін сақтап, нарықты тұрақтандыруды көздейді.
Саяси жағдай және Трамптың ұстанымы
АҚШ президенті Дональд Трамп Ормұз бұғазын тез арада қайта ашуға мүмкіндігі бар екенін мәлімдеді. Сонымен қатар ол Шығанақ елдерін өз теңіз қауіпсіздігіне көбірек жауапкершілік алуға шақырды. Соңғы мәліметтер бойынша, қазіргі уақытта АҚШ, Иран және аймақтық делдалдар арасында 45 күндік бітім туралы құпия келіссөздер де жүріп жатыр.
Еске сала кетейік, Иран демалыс күндері өтуі тиіс келіссөздер алдында, Ормұз бұғазын ашқан соң, бірнеше сағаттан кейін қайта жапқан. Ислам революциясы сақшылар корпусымен (ИРСК) байланысы бар Tasnim ақпараттық агенттігінің хабарлауынша, Иран теңіз блокадасының жалғасуына байланысты бүгін, жексенбіде, Ормұз бұғазы арқылы тағы екі мұнай танкерінің өтуіне жол бермеген.
