Қытайлық Xpeng компаниясы 2027 жылдан бастап ұшатын көліктерді жаппай өндіріске шығаруды жоспарлап отыр. Қазірдің өзінде 7 мыңнан астам алдын ала тапсырыс жиналған, олардың басым бөлігі Қытайда берілген. Бұл туралы Бейжің автосалоны қарсаңында компания президенті Брайан Гу хабарлады.
Ұшатын көлік және реттеу кедергілері
Бұл көлік кәдімгі жолда жүрумен қатар, төмен биіктікте ұшу мүмкіндігіне ие. Брайан Гудың айтуынша, компания келесі жылдан-ақ жаппай өндіріс кезеңіне өтуді көздеп отыр.
Алайда басты кедергі – сертификаттау. Қазір Xpeng Қытайдың авиациялық реттеушілерімен келісу рәсімінен өтуде. Олардың рұқсатынсыз көлікті коммерциялық түрде сату мүмкін емес.
Гуманоидты роботтар – 2026 жылдың соңында іске қосылады
2026 жылдың төртінші тоқсанына қарай Xpeng гуманоидты роботтарды сериялық өндіруді бастауды жоспарлап отыр. Бастапқы кезеңде оларды бөлшек сауда мен сервис саласында клиенттерге қызмет көрсету үшін пайдаланбақ.
Гудың бағалауынша, алдағы 10–20 жыл ішінде робототехника компанияның автомобиль бағытын көлемі жағынан басып озуы мүмкін.
Роботакси: сынақ осы жылы басталады
2026 жылы Xpeng Гуанчжоуда роботакси сынақтарын да іске қосады. Келесі 12–18 ай ішінде компания өндірісті жүздеген, тіпті ықтимал жағдайда мыңдаған көлікке дейін жеткізуді жоспарлап отыр.
Брайан Гу 2027 жылды маңызды кезең деп атады. Осы уақытқа қарай Қытайдан тыс аймақтарға серіктестік арқылы тестілік бағдарламаларды кеңейту жоспарланған.
Volkswagen-пен серіктестік
Xpeng пен Volkswagen қазірдің өзінде бірлесіп электромобиль жасап шығарды, ол қазіргі уақытта өндірісте. Гудың айтуынша, тараптар арасында ынтымақтастықты одан әрі тереңдетуге мүмкіндік бар. Сонымен қатар компания басқа автокөлік өндірушілерімен де альянс құруды жоққа шығармайды.
Қазіргі таңда Xpeng шамамен 60 елде жұмыс істейді. Өткен жылдың қорытындысы бойынша шетел нарықтары сатылым көлемінің шамамен 10%-ын және табыстың 15%-ын қамтамасыз еткен.
Алдағы 5–10 жыл ішінде компания табысының жартысынан көбі Қытайдан тыс нарықтардан түседі деп күтеді.
Еске салайық, Қазақстанда да ұшатын әуе таксилері пайда болады. Алатау қаласынан Алматы мен облыстың өзге қалаларына аэротакси қатынайды. Төрт жолаушыға арналған Joby Aviation S4 аппараттары 2026 жылы сынақтан өтеді.
