Солтүстік Қазақстан облысында 2026 жылы құтырудың бір жағдайы тіркелді. Ошақ Есіл ауданының Амангелді ауылында анықталды.
Петропавл.news ақпаратынша, 26 ақпанда ауыл тұрғыны ветеринарлық қызметке жүгінген, оны өз иті қапқан.
«Мамандар жедел түрде патологиялық материал алып, оны Республикалық ветеринарлық зертхананың Солтүстік Қазақстан филиалына жіберді. 3 наурызда зертханалық зерттеу нәтижелері бойынша «құтыру» диагнозы расталды», – деп хабарлады баспасөз қызметі.
Ауылда шектеу енгізілді
Диагноз расталғаннан кейін, ауылда шектеу шаралары енгізілді. Тиісті шешімді ауылдық округ әкімі 2026 жылғы 5 наурызда қабылдады. Осыдан кейін мамандар эпизоотияға қарсы кешенді шаралар жүргізген. Атап айтар болсақ,
– үй-жайларға дезинфекция жасалды;
– ошақты оқшаулау жұмыстары ұйымдастырылды;
– жануарларға вакцинация жүргізілді.
18 наурызда ветеринарлық қызмет 45 жануарға вакцина салды. Оның ішінде:
– 36 бас ірі қара;
– 1 ит;
– 8 мысық бар.
Шектеу қашан алынады
Басқармада шектеулер белгіленген тәртіпке сәйкес алынатынын түсіндірді.
«Шектеу шаралары соңғы өлім-жітім немесе вакцинация жағдайынан кейін 60 күн өткен соң алынады», – деп атап өтті ведомство.
Ветеринарлық қызмет жағдайды бақылауда ұстап отыр. Барлық қажетті шара уақытында және толық көлемде қабылданған.
Айта кететін жайт, құтырудың қауіптілігі сол, аурудың белгілері пайда болса, әрдайым өлімге әкеп соғады. Десе де, жұқтырудың алдын алуға болады. Қарапайым қорғану ережелерін білу, құтырған жануар тістеп алған жағдайда дұрыс әрекет етіп, дер кезінде дәрігерге қаралу керек.
