Әлемнің түрлі елдері қауіпті хантавирус тараған MV Hondius круиз лайнерінің жолаушыларын іздестіріп жатыр.
Инфекция анықталғанға дейін кейбір адамдар кемеден түсіп кеткен. Қазір олардың нақты қайда жүргені белгісіз, деп хабарлайды Reuters.
Дүниежүзілік денсаулық сақтау ұйымының мәліметінше, кеме бортында үш адам көз жұмған. Олар – Нидерландтан келген ерлі-зайыпты және Германия азаматы. Тағы сегіз жолаушывирус жұқтырған деп есептеліп отыр.
Бортында шамамен 150 адам бар лайнер қазір Кабо-Верде жағалауында дрейф жасап жүр. Кеме Испанияның Тенерифе аралына бет алған, ол жерге сенбі күні жетуі тиіс.
Жолаушыларды бүкіл әлемнен іздеп жатыр
Нидерланд билігі шамамен 40 адамның аралық аялдама кезінде Әулие Елена аралында кемеден түскенін хабарлады. Қазір олардың қайда екені белгісіз.
Олардың арасында қаза тапқан жолаушылардың бірінің жұбайы да болған. Ол сапар барысында өзін жайсыз сезіне бастаған және Нидерландқа оралмай тұрып қайтыс болған. Бұған дейін жағдайының нашарлауына байланысты оны Йоханнесбургте KLM әуе компаниясының рейсінен түсіріп алған.
Вирус туралы не белгілі
Науқастардан хантавирустың анд штамы анықталған. Ол адамнан адамға жұғуы мүмкін, бірақ тек өте тығыз байланыс кезінде беріледі. Мамандар мұндай жағдайлар өте сирек кездесетінін атап өтті.
Соған қарамастан, бұл жағдай санитарлық қызметтердің ерекше бақылауына алынды. АҚШ-тың Ауруларды бақылау және алдын алу орталығы халық үшін қауіп деңгейі әлі де өте төмен екенін мәлімдеді.
Францияда бір азаматтың вирус жұқтырған адаммен байланыста болғаны хабарланды. Алайда онда ешқандай симптом байқалмаған.
Қабылданып жатқан шаралар мен эвакуация
Круиз бағыты басталған Аргентинада инфекция көзі болуы мүмкін кеміргіштердің бар-жоғына тексеру жүргізіліп жатыр.
Үш науқас кемеден эвакуацияланды. Бірі Нидерландта, екіншісі Германияда ем қабылдауда. Үшінші науқас өмірді қамтамасыз ету жүйесіндегі ақаулар салдарынан рейс кешіккеннен кейін Нидерландқа жеткізілуі тиіс болған.
Тенерифеге жеткен соң барлық сау жолаушыларды өз елдеріне қайтару жоспарланып отыр. Испанияның 14 азаматы Мадридтегі әскери госпитальға карантинге орналастырылады.
Кеше Дүниежүзілік денсаулық сақтау ұйымының басшысы Тедрос Адханом Гебрейесус Атлант мұхитындағы круиздік лайнердегі хантавирус өршуі COVID-19 пандемиясының басталуына ұқсамайтынын мәлімдеді.
Айта кететін жайт, аусыл індетіне байланысты Қазақстан Қытай және Ресеймен шекарада бақылауды күшейтіп отыр.
