Өскеменде сот өңірге танымал кәсіпкер және облыстық мәслихат депутаты Дмитрий Сомовқа қалалық құрылыс бөлімінің басшысына пара беру ісі бойынша үкім шығарды. Сот мәліметінше, сөз осы жылдың ақпан айында берілген бес миллион теңге туралы болып отыр.
«Ақшалай қаражат құрылыс нысандары бойынша кейіннен төлем алу үшін орындалған жұмыс актілеріне жеделдетіп қол қоюға арналған», – деп хабарлады Шығыс Қазақстан облыстық сотының баспасөз қызметі.
Тексеру барысында анықталғандай, шенеунік ақшаның берілу фактісі туралы құзырлы органдарға хабарлаған. Қылмыстық іс кінәні мойындау туралы процестік келісім ретінде жеделдетілген тәртіппен қаралды. Сотталушы айыпты дауламады және тергеу материалдарымен келісті.
«Сот сотталушыны Қылмыстық кодекстің 367-бабы 2-бөлігі бойынша кінәлі деп танып, 100 миллион теңге көлемінде айыппұл түріндегі жаза тағайындады», – деп атап өтті сотта.
Үкім жарияланғаннан кейін кәсіпкер сот залынан босатылды. Айыппұлдан бөлек, ол мемлекеттік қызметте, квазимемлекеттік секторда және мемлекет қатысатын ұйымдарда лауазымдарды атқару құқығынан өмір бойына айырылды.
Сондай-ақ сот Қазақстан президентіне Дмитрий Сомовты мемлекеттік наградадан – III дәрежелі «Еңбек Даңқы» орденінен айыру туралы ұсыныс жолдайды.
