Қазақстандағы өзбекстандық компаниялар саны соңғы үш жарым жылда шамамен төрт есе өсті. 2026 жылы бұл өсім одан әрі қарқын алды. Қазір өзбекстандық бизнес Қазақстандағы серіктес елдер арасында ең жоғары қарқынмен дамып келеді.
Ұлттық статистика бюросы мәліметінше, 2026 жылғы 1 мамырдағы жағдай бойынша Қазақстанда өзбектердің қатысы бар 8 275 компания жұмыс істеген. Салыстырмалы түрде алсақ, 2022 жылдың қарашасында мұндай компаниялар саны 2 072 болған. Осылайша, Қазақстандағы өзбекстандық компаниялар саны шамамен 300%-ға өскен.
2026 жылы ел аумағында жаңа компаниялар көбірек тіркеле бастады. Бұрын өсім біртіндеп байқалса, қазір динамика айтарлықтай жеделдеген. Тек соңғы екі айдың өзінде Қазақстандағы өзбекстандық компаниялар саны 1 376-ға артқан.
- 2026 жылғы наурыз–сәуір аралығында – 866 компанияға;
- сәуір–мамыр аралығында – 510 компанияға артқан.
Бірінші кредиттік бюроның дерегіне сәйкес, наурыздағы өсім кейінгі бес жылдағы рекордтық көрсеткішке жеткен. Ал сәуірдегі өсім де осы кезеңдегі ең жоғары нәтижелердің бірі саналады.
Өзбектердің тұрақты бизнестері де көбейіп жатыр
Статистикаға қарағанда, Қазақстанда тек жаңа компаниялар ашылып қана қоймай, белсенді жұмыс істейтін өзбекстандық бизнес саны да артып жатыр.
Көрсеткіштер:
- 2022 жылы – 2 072 компания;
- 2024 жылы – 3 829;
- 2026 жылы – 8 275 компания.
Осылайша, соңғы бірнеше жылда Өзбекстан Қазақстанға келетін жаңа шетелдік бизнестің негізгі көздерінің біріне айналды.
Өсім қай салаларда байқалады
Сарапшылардың айтуынша, жаңа бизнестің едәуір бөлігі құрылыс саласына тиесілі. Қазір Қазақстандағы өзбекстандық компаниялардың басым бөлігі мына салаларда жұмыс істейді:
- қызмет көрсету саласы – 42%;
- сауда – 25%;
- құрылыс – 21%.
Ресей көш бастап тұр, бірақ өсім баяулаған
Қазақстанда жұмыс істейтін шетелдік компаниялар саны бойынша Ресей әлі де бірінші орында.
2026 жылғы 1 мамырдағы жағдай бойынша елде жұмыс істейтін шетелдік компаниялардың саны:
- Ресейдің 17 112 компаниясы;
- Өзбекстанның 8 275 компаниясы;
- Қытайдың 7 407 компаниясы;
- Түркияның 3 298 компаниясы.
Алайда жағдай біртіндеп өзгеріп келеді. Өзбекстандық бизнес қарқынды өсуін жалғастырып жатса, 2024 жылдың соңынан бері ресейлік компаниялар саны керісінше ай сайын азая бастаған. Биыл сәуір айында Ресейге қатысы бар компаниялар саны 215-ке қысқарған. Бұл – соңғы бес жылдағы ең үлкен төмендеу көрсеткіштерінің бірі.
Айта кетейік, Қазақстанда жұмыс істейтін шетелдік компаниялардың қатары бір жылда 5 мыңға артқан.
