2010-2026 жылдар аралығында Қазақстанның солтүстік өңірлерінде халық санының тұрақты түрде қысқару үрдісі жалғасып келеді. Ресми статистикалық мәліметтерге сүйенсек, әсіресе Солтүстік Қазақстан және Қостанай облыстарында демографиялық көрсеткіштер айтарлықтай төмендеген. Ал Павлодар облысында жағдай салыстырмалы түрде тұрақты болғанымен, ұзақмерзімді өсім байқалмайды.
Өңірлік экономика мен еңбек нарығына тікелей әсер ететін демографиялық ахуалдың 16 жылдық динамикасы мынадай беталысты көрсетіп отыр:
- Солтүстік Қазақстан облысы (СҚО) – ең күрт төмендеу. Үш өңірдің ішіндегі ең күрделі жағдай осы облыста қалыптасқан. 2010 жылы өңірде 592 184 адам тұрса, 2026 жылдың басына қарай бұл көрсеткіш 514 132 адамға дейін қысқарған. Яғни, 16 жыл ішінде облыс халқының саны шамамен 78 мың адамға немесе 13%-ға азайған. Төмендеу графигі ешбір тоқтаусыз, жыл сайын тұрақты түрде құлдырап келе жатқанын анық көруге болады.
- Қостанай облысы – тұрақты қысқару. Аграрлы-индустриялы Қостанай өңірінде де ұқсас тенденция. 2010 жылы халық саны 882 786 адам болса, 2026 жылы бұл көрсеткіш 821 473 адамды құрады. Облыс осы аралықта шамамен 61 мың тұрғынын жоғалтқан. Айта кетерлігі, 2010-2016 жылдар аралығында халық саны біршама тұрақты (880 мың төңірегінде) сақталғанымен, 2017 жылдан бастап құлдырау процесі жеделдеген.
- Павлодар облысы – стагнация және ішінара тұрақтылық. Көршілес облыстармен салыстырғанда Павлодардағы өндірістік база халықтың күрт көшіп кетуін тежеп тұрғандай. 2010 жылы өңірде 744 097 адам тұрса, 2026 жылы бұл көрсеткіш 745 243 адамды құрап, бастапқы деңгейге қайта оралды. Дегенмен, облыс халқы 2016 жылы өзінің шарықтау шегіне (758 209 адам) жетіп, содан кейінгі онжылдықта біртіндеп төмендеу фазасына өткен.
Айта кетейік, мамыр айында Kursiv Media елімізде бала туу деңгейі 20 жылдың анирекордқа жеткенін жазған болатын.
