Кейбір ақпарат құралдары қоғам белсендісі әрі журналист Арман Шораевқа іздеу жарияланғаны туралы ақпарат тарата бастады.
Алайда Шораевтың өзі мұны толықтай терістеп отыр.
Zanamiviehali ақпаратынша, оның үстінен жасөспірімді ұрып-соқты деген арыз түскен. Содан кейін Арман Шораевқа іздеу жарияланған.
«Алайда (іздеу туралы – ред.) хабарлама қазірдің өзінде күшін жойды. Ақмола облысы полициясының мәліметінше, 24 мамыр күні Көкшетау тұрғыны кәмелетке толмаған ұлына дене жарақатын келтіргені жөнінде арыз жазып, онда Арман Шораевтың есімін көрсеткен», – делінген хабарламада.
Телеграм арнаның мәліметінше, осыдан кейін полиция қызметкерлеріне Шораевты ұстау туралы хабарлама жолданған. Алайда сол күні Арман Шораевтың өзі полицияға келіп, қажетті процессуалдық шаралар жүргізген көрінеді.
Қазіргі уақытта бағдар күшін жойған. Алайда арыз бойынша тексеру жұмыстары жалғасып жатыр.
Арман Шораевтың өзі ақпаратты жоққа шығарып отыр. Оның айтынша, бұл «фейк» хабарлама.
ҚХП партиясының төрағасы Ермұхамет Ертісбаев қоғам белсендісі Арман Шораевты «экстремист» деп атады. Бұған Мәжіліс депутаты Ирина Смирноваға тіл тигізгені себеп болған еді.
