Қостанай облысының соты өзін «Қазақстандағы №1 мобильді интернет» деп мәлімдеген Beeline операторының ролигіне қатысты азаматтық іс бойынша жеке ұйғарым шығарды.
YouTube платформасында жарияланған жарнамада «КаР-Тел» ЖШС операторының мобильді интернеті сапасы мен қамту аймағы бойынша Қазақстанда бірінші орында екені айтылған. Бұл роликке байланысты Tele2 және Altel брендтерін басқаратын «Мобайл Телеком-Сервис» ЖШС сотқа шағым түсірген.
Сот талқылауы барысында YouTube-те жарияланған жарнаманың талапқа сай емес белгілері бар екені және ол тұтынушыларды жаңылыстыруы мүмкін екені анықталды.
«Жарнамада көрсетілген мәліметтер жеткілікті әрі объективті дәлелдермен расталмаған. Қолданылған тұжырымдар тұтынушыларда оператордың телекоммуникациялық қызмет көрсету нарығында сөзсіз көшбасшы екені туралы пікір қалыптастыруы мүмкін», – делінген қаулыда.
Анықталған мән-жайларға байланысты сот жеке ұйғарым шығарып, Қазақстан Республикасының жарнама және бәсекелестікті қорғау саласындағы заңнамасының сақталуын тексеру үшін тиісті материалдарды уәкілетті мемлекеттік органдарға жолдады.
Жеке ұйғарымды қарау нәтижесінде Қазақстан Республикасы Бәсекелестікті қорғау және дамыту агенттігінің департаменті серіктестіктің әрекеттеріне талдау жүргізді.
«Тексеру барысында көрінеу жалған, жосықсыз және анық емес жарнаманы тарату арқылы жосықсыз бәсекелестік белгілері анықталды. Серіктестікке қатысты Қазақстан Республикасының бәсекелестікті қорғау саласындағы заңнамасын бұзу белгілерінің бар екендігі туралы хабарлама шығарылды», – деп хабарлады агенттік.
Компанияға аталған жарнамалық бейнероликті таратуды тоқтату, ресми теріске шығару жариялау және болашақта осындай заң бұзушылықтарға жол бермеу жөнінде шаралар қабылдау міндеттелді.
