Қазақстан президенті Қасым-Жомарт Тоқаев Қырғыз Республикасының президенті Садыр Жапаровқа құттықтау жеделхатын жолдады. Тоқаев көршілес елді БҰҰ Қауіпсіздік Кеңесінің тұрақты емес мүшесі болып сайлануымен құттықтады.
Жеделхатта бұл оқиғаның тек Қырғызстан үшін ғана емес, бүкіл Орталық Азия өңірі үшін тарихи маңызы зор екені атап өтілген.
«Бұл – Қырғыз Республикасы Президентінің бастамасымен жүзеге асырылып жатқан сындарлы саясаттың халықаралық деңгейдегі мойындалуының белгісі. Қазақстан бұл мәселеде Қырғызстанның кандидатурасын басынан бастап қолдады. Алдағы уақытта да осы жауапты міндетті атқару жолында жан-жақты қолдау көрсетуге дайынбыз», – делінген Мемлекет басшысының жолдауында.
Қасым-Жомарт Тоқаев Қырғызстанның 2027-2028 жылдарға арналған БҰҰ Қауіпсіздік Кеңесіндегі қызметіне табыс тілеп, бауырлас елдің жаһандық саясаттағы беделі бұдан да биіктей беретініне сенім білдірді.
Еске сала кетейік, Біріккен Ұлттар Ұйымының Қауіпсіздік Кеңесі – әлемдегі бейбітшілік пен қауіпсіздікті сақтауға жауапты ең жоғары орган. Оған мүше болу – кез келген мемлекеттің сыртқы саясатындағы елеулі жетістік болып саналады.
