Halyk Finance мамандарының бағалауынша, егер мұнайдың орташа бағасы барреліне 85 доллар деңгейінде сақталса, 2026 жылдың соңына қарай бір доллардың бағамы шамамен 540 теңгеге жетуі мүмкін.
Сарапшылардың айтуынша, теңгенің бұлай құнсыздануына елдегі қымбатшылық, шетелдік инвесторлардың біздің бағалы қағаздарға қызығушылығының азаюы және биыл Ұлттық қордан сатылатын доллар көлемінің былтырғыға қарағанда едәуір аз болуы тікелей әсер етеді.
Бұған қоса, үкіметтің сыртқы қарызы, мұнай бағасының тұрақсыздығы және елге кіріп-шығатын шетел валютасы көлемінің өзгеруі секілді факторлар да осы болжамға өз әсерін тигізуі мүмкін.
Еске сала кетейік, маусым айында Ұлттық қордан сатылатын валюта көлемі екі есеге қысқарып, 200-300 млн долларды құрайды деп жоспарлануда.
БЖЗҚ үшін қосымша валюта сатып алынбаған жағдайда, Ұлттық Банктің нарықтағы таза сатылымы шамамен 1 млрд доллар көлемінде болуы мүмкін. Осыған байланысты, сондай-ақ шетелдік инвесторлардың мінез-құлқы мен зейнетақы активтерін қалыптастыру операцияларының әсерінен жақын перспективада теңге бағамы біртіндеп әлсіреу үрдісін көрсетеді деп күтілуде. Бұл кезеңде мұнай бағасы секілді сыртқы факторлар бағамға тек жанама түрде ғана әсер ететін болады.
