Қазақстанның жылжымайтын мүлік нарығындағы қазіргі үрдістер баспана сатып алуға қарағанда, оны жалға алу шығынының әлдеқайда қарқынды өсіп жатқанын айғақтайды. Ұлттық статистика бюросының 2026 жылғы мамыр айындағы мәліметтеріне сүйенсек, тұрғын үй нарығында бағаның әрқилы бағытта құбылуы мен құрылымдық өзгерістері байқалады.
Мамыр айындағы нарық тынысы
Бір айлық кезеңде (сәуір айымен салыстырғанда) республика бойынша жаңадан салынған үй бағасы орта есеппен 0,2%-ға өсті.
Бұл ретте баға Қостанай (+1,5%), Павлодар (+1,4%), Қызылорда (+1,2%) және Жезқазған (+1%) қалаларында өскен. Астанада жаңа тұрғын үйлер бір айда 0,3%-ға қымбаттаса, Алматы қаласында бастапқы нарықтағы баға тұрақтылық танытып, өзгеріссіз қалды. Жалпы алғанда, есепті кезеңде республиканың ешбір өңірінде жаңа пәтерлер арзандамаған.
Керісінше, қайталама нарықтағы пәтер бағасы мамыр айында ел бойынша орта есеппен 0,6%-ға төмендеді. Әсіресе, Ақтөбе (-2,1%), Қарағанды (-2,2%), Петропавл (-2%), Қонаев (-1,5%), Қостанай (-1,2%) және Жезқазған (-1,1%) қалаларында баға қарқыны бәсеңдеген.
Ірі мегаполистерде де пәтерлер арзандай түсті: қайталама нарық көрсеткіші Алматыда 0,6%-ға, ал Астанада 0,4%-ға кеміді. Дегенмен қайталама нарықтағы бағасы өскен өңірлер де бар: Талдықорғанда баға 2%-ға, Орал мен Өскеменде 0,7%-ға, ал Қызылордада 0,5%-ға артты.
Ал жалдамалы баспана бағасы бір ай ішінде ел бойынша орташа есеппен 0,8%-ға жоғарылады. Сондай-ақ қос мегаполисте де пәтер ақысы өсуін тоқтатқан жоқ: мамырда жалдау құны Астанада 1,3%-ға, ал Алматыда 0,5%-ға артты.
Баға Қызылорда (+6,4%), Көкшетау (+5,9%), Қонаев (+4,6%), Қостанай (+3,2%) және Атырау (+2,9%) қалаларында қатты өскен. Ал Ақтөбе (-1,8%), Өскемен (-1,7%), Ақтау (-1,5%), Шымкент (-2,2%) және Тараз (-0,6%) қалаларында пәтерді жалға алу құны керісінше арзандады.
Бір жылда баға қатты өсті
Қазіргі жағдайды 2025 жылдың мамыр айымен салыстырғанда, жылдық өсім қарқыны жоғары. Бір жылда ел бойынша 1 шаршы метр жаңа баспананың орташа құны 14,5%-ға өсіп, 614 мың теңгеге жетті.
Мамыр айының қорытындысы бойынша жаңадан салынған баспананың бір шаршы метрі Астанада 734,5 мың теңгеге, ал Алматыда 718,4 мың теңгеге жетті.
Бір жыл ішінде жаңа пәтерлер Ақтөбеде – 19,5%-ға (шаршы метрі 356,5 мың теңгеге дейін), Астанада – 18,2%, Алматыда 15,8%-ға қымбаттады.
Шымкент қаласында бастапқы нарықтағы баспана бағасы 11,8%-ға көтеріліп, шаршы метрі 535 мың теңгені құрады.
Қайталама нарықтағы баспана құны да бір жылда 10,8%-ға артып, Қазақстан бойынша орташа есеппен шаршы метріне 626,2 мың теңгені құрады. Бұл бағытта көш бастаған Талдықорғанда баға 14,4%-ға (шаршы метріне 425,4 мың теңге) өсті. Сондай-ақ қолданыста болған пәтерлерді қайта сату құны Алматыда 12,8%-ға (724,2 мың теңге), Астанада 12,2%-ға (725,7 мың теңге) артты. Шымкентте қайталама нарық бағасы 5,2%-ға жоғарылап, шаршы метрі 462,9 мың теңгеге жетті.
Жалдамалы тұрғын үй нарығында баға қатты көтерілген. Бір жыл ішінде баспананы жалға алу құны ел бойынша 13,3%-ға артып, шаршы метріне орта есеппен 5 мың теңгеге жетті.
Пәтерді жалға алу құны Петропавлда бірден 40,1% (шаршы метріне 4,7 мың теңге) және Павлодарда 37,6%-ға (3,8 мың теңге) қымбаттады. Сонымен қатар Қызылорда, Ақтау және Өскеменде пәтер жалдау қымбатқа түседі.
2026 жылдың І тоқсанындағы статистикаға сүйенсек, республика бойынша 37 583 бірлік тұрғын үй пайдалануға берілген.
