Қазақстандық теннисші Михаил Кукушкин биыл кәсіби мансабын аяқтайтынын мәлімдеді. 38 жастағы спортшы үшін соңғы турнир қазан айында өтетін Almaty Open ATP 250 болады.
Кукушкин жанкүйерлеріне, командасына, жақындарына және мансабы бойы оны қолдағандардың барлығына алғыс айтты. Теннисшінің айтуынша, бұл шешім оған оңайға соқпады, өйткені теннис көп жылдар бойы оның өмірінің басты ісі болған.
«Достар, жанкүйерлер және менің теннис тарихымның бір бөлігі болған барша жандар, кейде тоқтап, артқа көз жүгіртіп, «Рахмет» дейтін сәт келеді. Бүгін мен сіздермен маңызды шешіміммен бөліскім келеді. Кәсіби теннисте өткізген ұзақ жылдардан кейін мен биыл спорттық мансабымды аяқтаймын. Шынымды айтсам, сөз табу қиын. Теннис мен үшін жай ғана жұмыс немесе спорт емес еді. Бұл менің өмірім болды. Бала кезімнен ол маған армандауды, күресуді, жеңіліске мойынсұнбауды, жеңісті бағалауды және ешқашан берілмеуді үйретті», – деп жазды Кукушкин Instagram желісінде.
Спортшы кәсіби турда өткізген жылдары жеңістер мен жеңілістерді, жарақаттар мен қайта оралуларды бастан кешкенін атап өтті. Кукушкин бұл жолдың оны тұлға ретінде қалыптастырғанын айтты.
Ол, сондай-ақ, отбасына, бапкерлеріне, командасына, достарына, серіктестеріне және жанкүйерлеріне алғыс білдіріп, қолдаудың қиын кезеңдерде мансабын жалғастыруға көмектескенін ерекше атап өтті.
«Қазан айына дейін әлі уақыт бар. Тағы бірнеше турнир, жаттығулар, эмоциялар мен естеліктер күтіп тұр. Ал соңғы матчыма шыққанда, жолымды үлкен арманы бар кішкентай бала кезімдегідей күресу және ойыннан ләззат алу ниетімен шығамын», – деп қосты теннисші.
Кукушкиннің мансабы
Кукушкин кәсіби мансабын 2006 жылы бастап, 2008 жылдан бері Қазақстанның атынан өнер көрсетіп келеді. ATP рейтингіндегі ең жоғары нәтижесі – 39-орын, оған 2019 жылдың 25 ақпанында жеткен. Мансабында ол жекелей сында бір ATP титулын жеңіп алды.
Кукушкиннің басты жетістіктерінің бірі – 2010 жылы Санкт-Петербургте өткен ATP турниріндегі жеңісі. Ол кезде финалда Михаил Южныйды жеңген болатын. Сонымен қатар, Кукушкин «Үлкен дулыға» турнирлерінде төртінші айналымға дейін жетіп, көп жылдар бойы Дэвис кубогындағы Қазақстан құрамасының көшбасшыларының бірі болды.
