Халықаралық гроссмейстер, әлемдік рейтингте үздік бестікке енген қазақстандық шахматшы Бибісара Асаубаева өзінің әлеуметтік желідегі парақшасында президент Қасым-Жомарт Тоқаевтан көмек сұрады. Спортшы Норвегияда өткен халықаралық турнирде мерзімінен бұрын 1-орынды жеңіп алғанын хабарлай отырып, отандық спорт саласындағы бірқатар күрделі мәліметтердің бетін ашты.
Дайындық шығындары
Бибісара Асаубаеваның айтуынша, осы маңызды жарыс алдындағы оқу-жаттығу жиындары оның жеке жүлде қоры мен ата-анасының қаражаты есебінен қаржыландырылған. Тіпті, турнир барысында көмектескен секунданттар мен сарапшылардың еңбекақысы әлі күнге дейін төленбеген.
Сонымен қатар спортшы Спорт министрлігі тарапынан берілетін сыйақы көлеміндегі үлкен айырмашылыққа назар аударды:
Шахматтан әлем чемпионатындағы жеңіс үшін: 2 000 доллар, ал Олимпиада медалі үшін: 250 000 доллар.
Гроссмейстер Қазақстанда әйелдер мен ерлер арасында өзінен басқа шахматтан әлем чемпиондары жоқ екенін айтып, бұл спорт түріне деген қолдаудың төмендігіне қынжылыс білдірді.
Мемлекеттік награда мен министрліктің үнсіздігі
2025 жылдың желтоқсан айында президент жарлығымен Бибісара Асаубаеваға 2-дәрежелі «Барыс» ордені берілген. Спортшы бұл марапатты алу үшін Спорт министрлігінің шақыруымен Астана қаласына үш рет ұшып келгенін, алайда министрліктің бастамасымен кездесулер үнемі кейінге шегеріліп, орден әлі күнге дейін табысталмағанын айтты.
«Біз сәуір және мамыр айларында «e-Otinish» порталы арқылы Сіздің атыңызға үш мәрте хат жолдадық, бірақ әлі күнге дейін жауап жоқ. Хаттарды министрдің WhatsApp желісіне де дубликат етіп жібердік. Үнсіздік», – деп жазды шахматшы.
Бибісара Асаубаева алда үлкен жарыстар, маңызды жиындар және ауқымды жұмыстар күтіп тұрғанын алға тартып, Мемлекет басшысынан: «Маған не істеу керек, мырза Президент?» деп көмек сұрады.
Қазіргі уақытта Туризм және спорт министрлігі тарапынан ресми жауап әлі жарияланған жоқ.
Еске сала кетейік, бұған дейін Бибісара Асаубаева Norway Chess турниріндегі жеңісінен кейін, FIDE Women’s Circuit рейтингінде көш бастаған еді.
