Алматы полициясы «Kyzdar.net» интернет-ресурсы иелерінен қандай мүлік тәркіленгені туралы ақпарат таратты. Соған сәйкес, күдіктілердің атында шағын және орта бизнес саласында қызмет ететін 8 компания болған.
Алматы қаласы мен Алматы облысы аумағындағы бағалы мүлік тіркелген. Ішінде 5 пәтер, 6 коммерциялық нысан, 6 коттедж, 10 жер учаскесі, 6 автотұрақ орны және 11 люкс санатындағы автокөлік бар.
«Қылмыстық жолмен алынған мүлікті тәркілеуді қамтамасыз ету және оны заңдастыру белгілерін анықтау мақсатында күдіктілердің және олармен байланысты компаниялардың мүлкіне қатысты мәмілелер тоқтатылды», – деп хабарлады полиция.
Бұған дейін Ішкі істер министрлігі еліміздегі жеңгетайлық пен интимдік қызметтерді насихаттайтын «Kyzdar.net» ұйымдастырушылары мен түпкілікті бенефициарларын құрықтады.
Платформада интимдік сипаттағы 9 мыңға жуық анкета орналастырылған. Оның ішінде 500-ден астамы трансвеститтер мен дәстүрлі емес сексуалдық бағдардағы адамдарға тиесілі болған.
«Kyzdar.net» заңсыз қызметінен түскен қаржы ағыны айына 500 миллион теңгеден асқан.
Тәркіленген дүние-мүлік
Жедел-іздестіру іс-шараларының нәтижесінде полиция қызметкерлері күдіктілерден қомақты қаражат пен дәлелдемелерді тәркіледі:
- 1,3 миллион АҚШ долларынан астам қаржы (оның 300 мың доллары – криптовалюта);
- 144 миллион теңге қолма-қол ақша;
- Шамамен 150 бірлік компьютерлік техника және өзге де құрылғылар;
- Қару-жарақ, оқ-дәрілер және автокөліктер.
