Алматыда Yandex Qazaqstan компаниясы жүргізушісіз жүретін таксиді таныстырды. Әзірге бұл қызмет іске қосылған жоқ, бірақ болашақта мұндай роботаксилер Қазақстанның ірі қалаларында пайда болуы мүмкін. Бұл туралы Көлік министрлігі хабарлады.
Hyundai Sonata көлігі негізінде жасалған жүргізушісіз автомобиль вице-министр Дамир Қожахметовке көрсетілді.
Жобаны кезең-кезеңімен енгізу жоспарланып отыр. Алғашында роботаксилер шектеулі аумақта сынақ режимінде жұмыс істейді. Бұл технологияның қала жағдайында қалай жұмыс істейтінін тексеруге мүмкіндік береді. Компания тәулік бойы диспетчерлермен байланыс болады және сапарлардың сақтандырылып отырады.
Арнайы заңнама әзірленеді
Қазір Қазақстанда жүргізушісіз көліктерді ресми пайдалануға мүмкіндік беретін заңнамалық өзгерістер әзірленіп жатыр. Жаңа түзетулер роботаксилерді пайдалану тәртібін айқындап, мемлекеттік органдардың міндеттерін бөліп, қызметтің құқықтық негізін қалыптастыруы тиіс.
Роботаксиді алғаш болып Алматы мен Астанада іске қосу жоспарланған. Министрлік бұл қалаларда қажетті цифрлық инфрақұрылым бар деп есептейді. Билік өкілдері жаңа технологияны енгізу барлық қауіпсіздік талаптары сақталған жағдайда ғана жүзеге асатынын атап өтті.
Бұған дейін Алматы әкімдігі 1 мамырға дейін жүргізушісіз такси қызметі іске қосылады деп хабарлаған. Олардың дерегінше, бастапқы кезеңде желіге 50 жүргізушісіз автокөлік шығарылады.
