Мемлекет басшысы Қасым-Жомарт Тоқаев Германияның Федералдық экономика және энергетика министрі Катерина Райхені қабылдады. Кездесуде тараптар екі ел арасындағы стратегиялық және экономикалық байланыстарды талқылады.
Неміс капиталының белсенділігі
Германия Қазақстанның ең ірі сауда және инвестициялық серіктестерінің бірі. 2005 жылдан бері еліміздің шикізаттық емес секторына 8 миллиард доллардан астам тікелей инвестиция тартылған. Қазіргі таңда Қазақстанда неміс капиталы бар 1000-нан астам компания (соның ішінде Siemens, BASF, Knauf, CLAAS) табысты жұмыс істеп жатыр.
Жаңа мүмкіндіктер
Президент германиялық бизнестің қазақстандық нарыққа келуі үшін барлық жағдайды жасауға дайын екенін мәлімдеді. Ал Катерина Райхе Қазақстанның аймақтағы ірі серіктес екенін айтып, ынтымақтастықты кеңейтуге ниетті екенін жеткізді.
Серіктестік бағыттары
Тараптар энергетика, өнеркәсіп, цифрландыру, сирек кездесетін металдарды өндіру және көлік-логистика салаларындағы бірлескен жобаларды жандандыруға уағдаласты.
Кездесу барысында Қасым-Жомарт Тоқаев елдегі ауқымды саяси өзгерістер мен жаңа Конституцияның негізгі қағидаттарына тоқталып өтті.
Кездесу соңында мемлекет басшысы Германияның Федералдық Президенті Франк-Вальтер Штайнмайер мен Федералдық канцлер Фридрих Мерцке өз сәлемін жолдады.
