Алматыда Денис Тен, Наталья Сац және Әмен Қайдаров атындағы жаңа көшелер пайда болды. Алматы әкімдігінің қаулысымен, қаладағы ондаған көшеге жаңа атау берілді.
Олардың арасында Вьетнамның бұрынғы президенті Хо Ши Мин, режиссер, театр қайраткері Наталья Сац, академик Әбдуәли Қайдар есімдері бар. Олимпиаданың қола жүлдегері Денис Теннің аты да бір көшеге берілді. Тұңғыш Президент саябағының оң жағындағы, «Архат» ықшамауданындағы 7-көше енді спортшының есімімен аталады. Дәл осы аудандағы 2-көшеге белгілі кинорежиссер, суретші Әмен Қайдаровтың аты беріледі.
Ал Бостандық ауданындағы 26-көше енді Әбдіжәміл Нұрпейісов, ал «Мамыр-1» және «Мамыр-2» шағынаудандарының арасындағы 3-көше Рәбиға Сыздық атындағы көше деп аталады.
Алматыда Денис Теннің құрметіне қойылған ескерткіш те бар. Биыл Олимпиада ойындарында мәнерлеп сырғанаушы Михаил Шайдоровтың жеңісінен кейін көпшілік Денис Тенді еске алып, ескерткішіне гүл шоқтарын қойған.
19 сәуірде белгілі ақын Мұхтар Шахановтың қазасынан кейін көпшілік оның атына көше беру туралы бастаманы көтерген. Тіпті Розыбакиев көшесін Мұхтар Шахановқа ауыстыру туралы петиция жарияланды.
Мақала жарияланғаннан кейін әкімдіктегілер көшелерге қатысты шешімнің 2025 жылдың қыркүйегінде қабылданғанын нақтылады. Тиісті құжат «техникалық себептерге» байланысты 2026 жылдың 30 маусымына дейін жарияланбаған
