Президент Қасым-Жомарт Тоқаев белгілі түрік холдингі «Anadolu Group» төрағасы Камиль Сулейман Языджиді қабылдады. Кездесуде еліміздегі жаңа инвестициялық жобаларды іске асыру мен экономикалық ынтымақтастықты тереңдету мәселелері сөз болды.
Мемлекет басшысы холдинг құрамындағы Efes Kazakhstan және Coca-Cola Almaty Bottlers компанияларының еліміздің экономикасына қосқан үлесін жоғары бағалады. Бұл кәсіпорындар көп жылдар бойы тұрақты жұмыс орындарын ашып, салық түсімдерін арттыруға септігін тигізіп келеді.
«Anadolu Group» холдингінің Қазақстандағы көрсеткіштері:
- 30 жылдық нәтиже: Холдинг осы уақытқа дейін еліміздің экономикасына 1 миллиард долларға жуықинвестиция салып, 10 мыңнан астам жұмыс орнын ашты.
- Өндірістің кеңеюі: Қазіргі таңда компанияның сусын шығаратын 5 зауыты сәтті жұмыс істеп тұр.
- Жаңа зауыт құрылысы: Ақтөбе облысында құны 100 миллион доллар болатын алтыншы кәсіпорынның құрылысы басталды.
Камиль Сулейман Языджи Мемлекет басшысына компаниялар тобының Қазақстандағы қазіргі жетістіктері мен болашаққа жоспарланған тың бастамалары туралы баяндады.
Қасым-Жомарт Тоқаев еліміздің өнеркәсіпті жаңғырту мен өнім өндірісін дамыту бағытындағы жұмыстарын атап өтті. Осы ретте, «Anadolu» тобының тек сусын өндірісімен шектелмей, Қазақстандағы қызмет аясын кеңейтуге ниетті екені айтылды. Алдағы уақытта инвесторлар агроөнеркәсіп кешеніндегі экспортқа бағытталған және инновациялық сипаттағы жаңа жобаларды қолға алуға қызығушылық танытып отыр.
Айта кетейік, осыған дейін президент Ислам даму банкінің басшысын қабылдаған еді.
