Көкшетаудағы ең ірі автобус паркінің жүргізушілері жалақының кешіктірілуіне байланысты ереуілге шықты.
Kokshetauinform ақпаратына қарағанда, 16 шілде күні таңертең Көкшетауда қоғамдық көлік қозғалысы тоқтап, «Көкшетау автобус паркі» ЖШС-нің автобустары бағыттарға шықпады.
Бұған дейін кәсіпорын ұжымы басшылыққа жазбаша үндеу жолдап, егер 15 шілденің соңына дейін жалақы толық төленбесе, 16 шілдеде жұмысқа шықпайтындарын ескерткен. Олар өз уәделерін орындады.
Жүргізушілер мен кондукторлар ұжымдық хатта жалақыны көтеруді де талап еткен. Олардың айтуынша, қазіргі табыс отбасының ең қарапайым қажеттіліктерін өтеуге де жетпейді.
Автобус паркінің басшылығы жалақының кешігуін мемлекеттік субсидияның уақытында бөлінбеуімен түсіндірді.
Ал Көкшетау қаласының ТКШ, жолаушылар көлігі және автомобиль жолдары бөлімі тасымалдаушыларға субсидия бойынша берешек жақын арада қарастырылған қаржы шегінде өтелетінін мәлімдеді. Сондай-ақ тұрақты қалалық маршруттардың үздіксіз жұмысын қамтамасыз ету мәселесі бақылауда екенін хабарлады.
Алайда мұндай жауап жүргізушілер мен кондукторларды қанағаттандырмаған. Егер тараптар жақын арада ортақ келісімге келмесе, Көкшетаудағы көлік дағдарысы ұзаққа созылуы мүмкін.
Ал былтыр Жаңаөзендегі мұнайшылар келіссөзден кейін ереуілді тоқтатқан болатын.
