Tesla компаниясы алғашқы екі доңғалақты көлігін шығарды. Алайда бұл көптен күтілген электровелосипед емес, 2-5 жас аралығындағы балаларға арналған педальсіз велосипед болып шықты. Құрылғыда мотор, аккумулятор және педаль жоқ. Оның бағасы – 225 доллар, бұл шамамен 108 мың теңге.
Tesla Balance Bike қандай көлік
Педальсіз велосипед Tesla-ның ресми фирмалық дүкенінде сатылымға шыққан. Модельде шынжыр мен беріліс жүйесі жоқ. Бала орындыққа отырып, аяғымен жерден итерілу арқылы қозғалады.
Негізгі сипаттамалары:
- магний қорытпасынан жасалған рама;
- 2-5 жас аралығындағы балаларға арналған;
- рамада Tesla фирмалық жазуы бар;
- рөл бағанында «T» логотипі орналасқан;
- қорапта үй жағдайында құрастыруға арналған құралдар жиынтығы бар.
Магний рама көліктің салмағын жеңілдетіп, құрылымның беріктігін арттырады. Мұндай сипаттама балаларға арналған көліктің қауіпсіз әрі ыңғайлы болуына әсер етеді.
Tesla жанкүйерлері бірнеше жылдан бері компаниядан электровелосипед шығаруды күткен еді. Тіпті интернетте Model B деп аталатын модель туралы түрлі болжамдар мен алдын ала жасалған үлгі суреттер тараған.
Алайда компания бұл жолы электр жүйесі жоқ қарапайым балалар өнімін ұсынды.
Бағасы
Tesla бұл құрылғының құнын 225 долларға бағалап отыр. Ал кәдімгі болат рамалы педальсіз велосипед бағасы орта есеппен 50–120 доллар аралығында.
Магний рамалы бәсекелес модельдер де арзанырақ. Мысалы, Hornit AIRO шамамен 73 доллар тұрады.
Tesla-ның 225 долларлық бағасы премиум сегменттегі ұқсас модельдермен шамалас. Мәселен, магний рамалы Woom 1 – 249 доллар, ал Strider 14x Sport – 220 доллар тұрады.
Осылайша Tesla балалар көлігі нарығында жоғары баға сегментіне шығып, негізгі артықшылығы ретінде бренд беделіне сүйеніп отыр.
Еске салайық, Илон Маск Tesla, SpaceX және басқа да технологиялық жобаларының арқасында әлемдегі ең бай кәсіпкерлердің біріне айналды. Оның SpaceX компаниясы IPO-да 75 млрд доллар тартқан соң, Маск дәулеті 982 млрд долларға жетті.
