Қазақстанның бірінші ракеткасы Александр Бублик Аустрияның Китцбюэль қаласында өтіп жатқан Generali Open-2026 турнирін сәтті бастады.
Жарыстың бірінші нөмірлі болған Бублик алғашқы айналымнан босатылған еді. Екінші айналымда отандық теннисші аргентиналық Факундо Диас Акостаны (108) 1 сағат 19 минут ішінде 6:3, 7:5 есебімен сенімді түрде жеңді. Матч барысында Александр 8 эйс жасады.
Бублик үшін бұл турнирдің маңызы зор. Ол былтырғы чемпиондық ұпайларын қорғауы тиіс, әйтпесе әлемдік рейтингте бірнеше сатыға төмендеп кету қаупі бар. Енді ширек финалда отандасымыз Алекс Молчан (Словакия) – Даниэль Альтмайер (Германия) кездесуінің жеңімпазымен шеберлік байқасады.
Өкінішке қарай, Қазақстанның тағы бір өкілі Александр Шевченко (84) алғашқы матчта-ақ германиялық Ян-Леннард Штруффтан (41) 6:3, 6:7 (5:7), 4:6 есебімен жеңіліп, жарысты ерте аяқтады.
Китцбюэльдегі грунт корттарында өтетін ATP-250 турнирінің тарихы 1894 жылдан басталады. Биылғы жүлде қоры 612,5 мың еуроны құрайды.
