Қазақстандық туристерге Ыстықкөлге бару жеңілдей түсті. Қырғызстан шекарадағы «Қарқара» өткізу пунктінің күнделікті жұмыс уақытын туристік маусым аяқталғанша ұзартты. Бұл туралы Қырғызстанның Шекара қызметі хабарлады.
«2026 жылғы 21 шілдеден 31 тамызға дейін өткізу пункті азаматтар мен көліктерді күн сайын Бішкек уақытымен 08:00-ден 21:00-ге дейін қабылдайды. Қазақстаннан келетін саяхатшылар үшін бұл уақыт Астана уақытымен 07:00-ден 20:00-ге дейін болады», – делінген ведомствоның ақпараттық хабарламасында.
Мұндай шешім туристік маусым кезінде жолаушылар санының көбеюіне байланысты қабылданды. Жұмыс уақытының ұзаруы шекарадан өтуді жеңілдетіп, адам көп жиналатын уақыттардағы жүктемені азайтуға мүмкіндік береді.
«Қарқара» өткізу пункті қай жерде орналасқан
«Қарқара-автожол» халықаралық өткізу пункті Ыстықкөл облысының Түп ауданында, Қазақстанмен шекарада орналасқан. Бұл бағыт арқылы Ыстықкөлдің шығыс жағалауына баратын туристік маршруттар өтеді.
Өткізу пункті азаматтар мен автокөліктерді шекарадан өткізуге арналған. Жаңа жұмыс кестесі уақытша енгізіліп, 31 тамызды қоса алғанға дейін қолданылады. Жазғы маусым аяқталғаннан кейінгі жұмыс тәртібі туралы Қырғызстан билігі әзірге ақпарат берген жоқ.
Туристер нені ескеруі керек
Көрсетілген уақыт – өткізу пунктінің жұмыс уақыты. Бұл шекараға келген бойда бірден өтуге кепілдік бермейді. Туристік маусым кезінде өткізу пунктінің алдында кезек пайда болуы мүмкін.Сондықтан сапар уақытын алдын ала жоспарлап, өткізу пунктіне ертерек барған дұрыс.
Айта кетейік, бұған дейін қазақстандық FlyArystan әуе компаниясы Алматы мен Ыстықкөл арасындағы тікелей әуе рейстерін қайта іске қосқан болатын.
