Қазақстанның мемлекеттік орман қоры аумағында бес орман өрті тіркелді, деп хабарлайды Экология және табиғи ресурстар министрлігі.
Бейінді ведомствоның мәліметінше, екі өрт Ақмола облысында, біреуі – Шығыс Қазақстан облысында, тағы екеуі – Батыс Қазақстан облысында орын алған.
Қазіргі уақытта Батыс Қазақстан облысында орман өрттерін оқшаулау және толық жою бойынша жұмыстар жалғасуда. Өртті сөндіруге орман шаруашылықтарының, мемлекеттік орман күзетінің күштері мен Төтенше жағдайлар департаментінің бөлімшелері жұмылдырылған.
Ақмола және Шығыс Қазақстан облыстарында өртті дер кезінде оқшаулап, толық өшіру мүмкін болды. Атап өтілгендей, өрт ошақтары анықталған бойда қажетті күштер мен құралдар жедел түрде тартылған.
Ведомствоның ақпараты бойынша, өрттер мемлекеттік орман күзетінің жерүсті патрульдеуі барысында анықталған. Ақпараттың жедел берілуі мен барлық жұмылдырылған қызметтердің үйлесімді жұмысының арқасында оттың үлкен аумақтарға таралуына жол берілмеді.
Өрт қаупі бар кезеңнің сақталуына байланысты табиғат аясында демалушы азаматтар мен орман пайдаланушылар өрт қауіпсіздігі талаптарын қатаң сақтауға шақырылды.
Естеріңізге сала кетейік, бұған дейін Қазақстанда Абай облысындағы «Семей орманы» аумағы бірнеше күн бойы өртенген.
