Қаржы нарығын реттеу және дамыту агенттігінің төрағасы Мадина Әбілқасымова мен Ұлттық банк төрағасы Тимур Сүлейменов Бейжіңде Қытайдың жетекші банктері және қаржы реттеушілерімен келіссөз жүргізді.
Nationalbusiness.kz мәліметінше, кездесу барысында Қазақстан мен Қытай арасындағы қаржы саласындағы ынтымақтастықты кеңейту және қытайлық банктердің Қазақстандағы қызметін дамыту мәселелері талқыланды.
Соңғы екі жылда Қытай банктері Қазақстандағы қызметін айтарлықтай күшейткен. Осы кезеңде олардың кейбірінің елдегі активтері 2–2,5 есеге өскен.
Мәселен, ICBC банкінің қазақстандық еншілес ұйымы ел экономикасына шамамен 500 млрд теңге инвестиция салған. Оның ішінде 260 млрд теңгеден астамы тікелей несиелеуге, ал 230 млрд теңгесі бағалы қағаздарды сатып алуға бағытталған.
Қазіргі уақытта банк «Самұрық-Қазына», «Бәйтерек», Қазақстанның Даму банкі және «Қазақтелеком» компанияларының жобаларын қаржыландырып отыр.
Мұның алдында Си Цзиньпин юаньды жаһандық резервтік валютаға айналдыруға шақырған болатын.
