Қорғаныс министрлігі тамыз-қыркүйек айларында автокөлік жолдарымен қару-жарақ, әскери техника және жауынгерлер тасылатынын алдын ала ескертті. Өйткені «Батыл тойтарыс – 2026» оқу-жаттығуы өткелі жатыр.
Кешенді жаттығу елдің барлық өңіріндегі оқу полигондарын қамтыды. «Батыл тойтарыс» қарулы күштердің жауынгерлік міндетті орындауға дайындығын бағалауды көздейді.
«Оқу-жаттығу барысында әскерлерді қолдану, құрлықта, әуе кеңістігінде, теңізде және киберкеңістікте бірыңғай жедел түрде өзара іс-қимылды ұйымдастыру мәселелері пысықталады», – деп хабарлайды Қорғаныс министрлігі.
Осыған байланысты министрлік азаматтар мен БАҚ өкілдерінен сабыр сақтап, ресми ақпарат көздеріне ғана сүйенуді және тексерілмеген мәліметтерді таратпауды сұрайды. Бұған қоса жалған ақпарат таратқандар жауапкершілікке тартылуы мүмкін екенін ескертті.
